صبیحہ فاطمہ - بنگلورو
"کی محمدؐ سے وفا تُو نے تو ہم تیرے ہیں
یہ جہاں چیز ہے کیا، لوح و قلم تیرے ہیں"
علامہ اقبال کے اس شعر کی روح 1500ویں بین الاقوامی میلادالنبیؐ کانفرنس 2025 میں زندہ ہوگئی۔ یہ عظیم الشان اجتماع جوائنٹ میلاد کمیٹی کے زیر اہتمام منعقد ہوا، جس میں جلوسِ محمدی کمیٹی بنگلورو، آل کرناٹک میلاد و جلوس رحمت للعالمین کمیٹی بنگلورو اور آل کرناٹک سنی جمعیۃ العلماء بنگلورو شامل تھے۔
یہ تاریخی پروگرام 5 ستمبر، بروز جمعہ، سہ پہر 3 بجے، 55 ایکڑ پر مشتمل پیلس گراؤنڈ بنگلورو میں منعقد ہوا، جہاں گلبرگہ، رائچور، ہبلی سمیت پورے کرناٹک سے ہزاروں افراد جمع ہوئے تاکہ حضور اکرم ﷺ کی ولادت باسعادت کے 1500 سال مکمل ہونے کا دن عقیدت و احترام سے منایا جا سکے۔
کانفرنس میں کئی ممتاز رہنماؤں اور علما کی شرکت اور پذیرائی ہوئی، جن میں شامل ہیں:
وزیر اعلیٰ شری سدارامیا
نائب وزیر اعلیٰ شری ڈی کے شیوکمار
وزیر بی زی ضمیر احمد خان (سرپرستِ اعلیٰ پروگرام)
وزیر اعلیٰ کے سیاسی سکریٹری نصیر احمد خان
این اے حارث (ایم ایل اے شانتی نگر)
کے جے جارج (وزیر)
سیف اللہ جنیدی، سہیل بیگ، نانا اسماعیل افسر بیگ معین الدین، اللہ بخش امیری، حافظ خری امام شفیق احمد، وزیر حج رحیم خان، محمد نلپاد
پروفیسر ڈاکٹر مفتی محمد سجاد عالم (کلکتہ)، مولانا توسیف رضا (بریلی)، مفتی فیض رضا خان (بریلی)، حضرت علامہ پیر سید محمد قاسم اشرف بابا، کیرالہ کے اسکالر ابراہیم خلیل تھنگل
ایس وائی ایس ریاستی صدر بشیر، ریاستی سکریٹری کے ایم صدیق، جعفر نورانی، صدیقی اور مولانا امداد اللہ
امام جامع مسجد، مولانا عبدالقادر
اسی طرح کمیونٹی رہنماؤں افسر بیگ، عثمان شریف (چیئرمین آل کرناٹک جلوس کمیٹی)، اور جی اے باوا نے بھی سہولت کاری اور معاونت میں اہم کردار ادا کیا۔
وزیر اعلیٰ سدارامیا نے کہا کہ حضور اکرم ﷺ کی تعلیمات نے پچھلے 1500 برسوں میں انسانی تاریخ میں انقلابی تبدیلیاں کیں۔ انہوں نے کہا کہ اسلام کا مطلب ہی امن ہے۔ فلسفی ونوبا بھاوے کے حوالے سے کہا کہ "نبی اکرم ﷺ امن کے پیامبر تھے، شانتی دوت تھے۔"انہوں نے بسونا کی تعلیمات سے موازنہ کرتے ہوئے کہا کہ جیسے انہوں نے مساوات اور امن کی بات کی، ویسے ہی نبی کریم ﷺ نے بھی امن، رحم اور ہم آہنگی کی دعوت دی۔ انہوں نے کہا:"انسانیت تبھی پروان چڑھتی ہے جب رواداری کو فروغ دیا جائے۔ آئیے ہم اتحاد کے ساتھ آئین کی روح کو برقرار رکھیں۔"
انہوں نے اپنے خطاب کا اختتام ان الفاظ سے کیا:
"جے ہند، جے کرناٹک، جے ہندو مسلمان۔"
نائب وزیر اعلیٰ ڈی کے شیوکمار نے کہا کہ نبی کریم ﷺ نے تمام طبقات میں مساوات قائم کی اور کمزور و بے سہارا لوگوں کے لیے کھڑے ہوئے۔انہوں نے کہا:"ہر مذہب امن سکھاتا ہے۔ ہر عبادت ایک خدا کی طرف اشارہ کرتی ہے۔ کوئی مذہب یہ نہیں کہتا کہ دوسروں کو تکلیف دو۔ جیسے نبی کریم ﷺ نے امن کی تعلیم دی، ویسے ہی ہمارا فرض ہے کہ اس ملک میں ہم آہنگی قائم رکھیں۔ مسلمان اپنے آپ کو اقلیت نہ سمجھیں — آپ ڈاکٹر ہیں، پروفیشنل ہیں، رہنما ہیں۔ ہمیں سب کو مل کر اس ملک کی وحدت اور سالمیت کے لیے کام کرنا ہے۔"
پروگرام کے دوران قادری محمد ظلفقار نوری نے وزیر بی زی ضمیر احمد خان کا یہ جملہ بار بار دہرایا:"میں اسٹیج پر نہیں بیٹھوں گا بلکہ عوام کے درمیان بیٹھ کر سنوں گا۔"اس عاجزانہ جذبے کو اسٹیج پر بار بار سراہا گیا اور حاضرین نے اسے سادگی اور احترام کی ایک عمدہ مثال قرار دیا۔
مفتی سجاد عالم نے یاد دلایا کہ مسجد نبوی میں ایک جماعت عبادت کرتی اور دوسری علم حاصل کرتی تھی۔ انہوں نے کہا"آج کے بحرانوں کا حل سیرتِ نبوی میں ہے۔ انسانیت کے مسائل کا جواب نبی کریم ﷺ کی زندگی کے مطالعے میں ہے۔ اسلام علم، شفقت اور امن کو ساتھ لے کر چلنے کی تعلیم دیتا ہے۔"
ابراہیم خلیل تھنگل (کیرالہ) نے وزیر اعلیٰ سدارامیا کو فرقہ وارانہ ہم آہنگی کی مثال قرار دیا اور کرناٹک میں پُرامن کانفرنس کے انعقاد کو سراہا۔
سید محمد قاسم اشرف بابا نے کہا:
"نبی کریم ﷺ نے گرنے والوں کو اٹھایا، ٹوٹے دلوں کو جوڑا، خالق اور مخلوق کے رشتے کو بحال کیا اور انسانیت کو جینے کا فن سکھایا۔ دولت اور طاقت کی کوئی حیثیت نہیں جب تک وہ دوسروں کے کام نہ آئے۔ اسلام امن کا مذہب ہے اور حتیٰ کہ پانی ضائع نہ کرنے جیسی تعلیم بھی ہمیں پائیداری کی راہ دکھاتی ہے۔"
ڈاکٹر عبدالحکیم اظہری (شہزادہ شیخ مصلیار) نے کہا:
"اسلام آج بھی نبی کریم ﷺ کے بے مثال اخلاق کی وجہ سے دلوں کو اپنی طرف کھینچتا ہے۔ جو لوگ آپ کو قتل کرنے آئے وہی آپ کے گرویدہ ہو گئے۔ یہ آپ کی رحمت اور امن کی طاقت ہے۔"
مولانا عبدالقادر، امام جامع مسجد، نے نعت خواں حضرات کی عزت پر روشنی ڈالتے ہوئے کہا"اللہ تعالیٰ نے نبی کریم ﷺ کو بلند ترین مقام عطا فرمایا اور ان کی مدح کرنے والوں کو بھی عزت بخشی۔ ہر شعر میں محبت، شفقت اور امن کا پیغام ہے۔"
پولیس کمشنر سیمانت کمار سنگھ نے اجتماع سے خطاب کرتے ہوئے کہا"نبی کریم ﷺ کی ولادت کے 1500ویں سال پر میں آپ سب سے اپیل کرتا ہوں کہ امن کے پیامبر (شانتی دوتھ) بنیں اور اس پروگرام کو پُرامن رکھیں۔"جی اے باوا نے پولیس تعاون اور حمایت پر شکریہ ادا کیا۔
کانفرنس میں محمد معین الدین، محمد جنید اشرفی کلکتوی اور محمد باقر نے روح پرور نعتیں پیش کیں۔ ہزاروں افراد کی شرکت نے ذات پات اور طبقاتی تفریق سے بالاتر ہو کر اتحاد کی فضا قائم کی۔
اسی موقع پر ایس وائی ایس ایمبولینس سروس کا آغاز بھی کیا گیا جس میں بشیر، صدیق، نورانی اور دیگر رہنما شریک ہوئے۔یہ عظیم الشان کانفرنس الحاج امیر جان قادری (چیئرمین مرکزِ اہل سنت جامعہ حضرت بلال، بنگلورو) کی صدارت میں منعقد ہوئی اور اس کی نظامت مولانا ظلفقار نوری اور مولانا این کے ایم شفی صعیدی نے کی۔
پروگرام کا اختتام دعا کے ساتھ ہوا جس میں امن، ہم آہنگی اور روزمرہ زندگی میں نبی کریم ﷺ کی تعلیمات پر عمل پیرا ہونے کی توفیق مانگی گئی۔ تمام خطابات کا مرکزی پیغام یہ تھا: اسلام امن ہے، نبی کریم ﷺ امن کے پیامبر ہیں، اور ہندوستان کا مستقبل اسی پیغام کو اتحاد و رواداری کے ساتھ جینے میں مضمر ہے۔
