کولکاتا: مغربی بنگال کے وزیر اعلیٰ شوبھیندو ادھیکاری نے پیر کے روز ریاستی اسمبلی میں اعلان کیا کہ یکم ستمبر 2026 سے ریاستی حکومت کی تمام سرکاری خط و کتابت بنگلہ زبان میں کی جائے گی۔ انہوں نے اسمبلی میں مرکزی وزیر داخلہ امت شاہ کا ایک خط بھی پڑھ کر سنایا، جس میں بھارتی زبانوں کے زیادہ سے زیادہ استعمال اور ان کے فروغ کے لیے مؤثر اقدامات کرنے کی اپیل کی گئی ہے۔

وزیر اعلیٰ نے کہا کہ امت شاہ نے اپنے خط میں ریاستی انتظامیہ کی ہر سطح پر بنگلہ زبان کے وسیع استعمال کو یقینی بنانے کی درخواست کی ہے۔ انہوں نے اعلان کیا کہ یکم ستمبر 2026 سے ریاستی حکومت کے تمام محکموں میں بنگلہ زبان کا استعمال لازمی ہوگا۔ انہوں نے مزید کہا کہ مرکزی حکومت اور دیگر ریاستوں کے ساتھ ہونے والی تمام سرکاری خط و کتابت بنگلہ میں کی جائے گی، جبکہ مرکز کے ساتھ مراسلت بنگلہ کے ساتھ ساتھ ہندی میں بھی ہوگی۔

فی الحال مرکزی حکومت کے ساتھ زیادہ تر سرکاری مراسلت انگریزی میں کی جاتی ہے۔ شوبھیندو ادھیکاری نے بتایا کہ مغربی بنگال کے حالیہ تین روزہ دورے کے دوران امت شاہ نے انہیں بنگلہ زبان میں ایک خط لکھا، جس میں بھارتی جن سنگھ کے بانی شیاما پرساد مکھرجی کے بھارتی زبانوں کے تحفظ، فروغ اور وسیع استعمال سے متعلق خیالات کا ذکر کیا گیا تھا۔

امت شاہ نے اپنے خط میں تجویز دی کہ محکمہ اراضی، محکمہ مال، وزیر اعلیٰ کے دفتر، فائلوں کے انتظام، نوٹنگ، بین محکمانہ خط و کتابت اور سرکاری احکامات سمیت تمام انتظامی امور میں بنگلہ زبان کو ترجیح دی جائے۔ انہوں نے مزید کہا کہ عوامی خدمات، ڈیجیٹل انتظامیہ، سرکاری ویب سائٹس، موبائل ایپس، میڈیا اشتہارات اور دیگر سرکاری کاموں میں بھی بنگلہ زبان کو ترجیح ملنی چاہیے۔ خط میں اس بات پر بھی زور دیا گیا کہ عوام کا اعتماد بڑھانے کے لیے ایف آئی آر درج کرنے، شکایات وصول کرنے، شہریوں کو معلومات فراہم کرنے اور عوامی آگاہی کے پیغامات میں بنگلہ زبان کا زیادہ سے زیادہ استعمال کیا جائے۔

امت شاہ نے اپنے خط میں کہا کہ مرکزی حکومت کے ساتھ سرکاری رابطے میں غیر ملکی زبان کے بجائے بنگلہ اور راج بھاشا ہندی کا استعمال کیا جا سکتا ہے۔ انہوں نے کہا کہ وزارت داخلہ میں فائلوں کی کارروائی، سرکاری نوٹس، بین محکمانہ خط و کتابت اور دیگر انتظامی کام ہندی میں مؤثر طریقے سے انجام دیے جا رہے ہیں، جس سے ثابت ہوتا ہے کہ بھارتی زبانوں کے ذریعے بھی بہترین طرزِ حکمرانی ممکن ہے۔

امت شاہ نے اظہارِ امید کیا کہ شیاما پرساد مکھرجی کی 125ویں یومِ پیدائش کے موقع پر مغربی بنگال حکومت بھارتی زبانوں کے فروغ اور ان کے وسیع استعمال کے لیے مؤثر اقدامات کرے گی۔ انہوں نے کہا کہ ایسے اقدامات نہ صرف بہتر طرزِ حکمرانی کو فروغ دیں گے بلکہ بھارتی زبانوں اور ثقافت کے تحفظ میں بھی اہم کردار ادا کریں گے۔ اس سے ایک روز قبل امت شاہ نے کولکاتا میں "شبد سنگرہالیہ" (لفظ میوزیم) کا افتتاح کرتے ہوئے مادری زبان کے ساتھ کم از کم ایک اور بھارتی زبان سیکھنے کی ضرورت پر بھی زور دیا تھا۔