کلکتہ: مرکزی وزیر داخلہ امت شاہ نے پیر کے روز کہا کہ مغربی بنگال میں انتخابات کے بعد اگر بھارتیہ جنتا پارٹی (بی جے پی) اقتدار میں آتی ہے تو بھی کم از کم سات دن تک مرکزی سکیورٹی فورسز تعینات رہیں گی۔ انہوں نے ووٹروں سے اپیل کی کہ وہ بغیر کسی خوف کے اپنا ووٹ ڈالیں۔

امت شاہ بہالا میں ایک روڈ شو کی قیادت کے بعد ایک عوامی جلسے سے خطاب کر رہے تھے۔ ریاست میں اسمبلی انتخابات کے دوسرے اور آخری مرحلے کے تحت بہالا میں 29 اپریل کو ووٹنگ ہوگی۔ انہوں نے کہابھائیوں اور بہنوں، 29 تاریخ کو جا کر ووٹ ڈالیں، غنڈوں سے ڈرنے کی ضرورت نہیں ہے۔ الیکشن کمیشن نے وسیع سکیورٹی انتظامات کیے ہیں اور میں آپ کو بتا دوں کہ اگر بی جے پی اقتدار میں بھی آتی ہے تو مرکزی فورسز یہاں کم از کم سات دن تک موجود رہیں گی۔

بہالا ایسٹ اور بہالا ویسٹ نشستوں سے بی جے پی امیدواروں کی حمایت میں یہ روڈ شو انتخابی مہم کے آخری دن منعقد کیا گیا۔ اس دوران جنوبی کولکتہ کا علاقہ زعفرانی رنگ میں نظر آیا۔ کھلے گاڑی میں سوار امت شاہ نے حامیوں کو ہاتھ ہلا کر سلام کیا۔ اس موقع پر بی جے پی کارکن "جے شری رام" اور "بھارت ماتا کی جے" کے نعرے لگاتے رہے