نئی دہلی: مغربی بنگال میں نجی بس آپریٹرز نے پیر کے روز ریاستی حکومت اور عدلیہ سے 15 سال سے زیادہ پرانی تجارتی گاڑیوں کو اسکریپ میں تبدیل کرنے کی پالیسی پر دوبارہ غور کرنے کی اپیل کی۔ بس آپریٹرز کی سرکردہ تنظیم ’جوائنٹ کونسل آف بس سنڈیکیٹ‘ نے حکومت کو دیے گئے ایک میمورنڈم میں یاد دلایا کہ کلکتہ ہائی کورٹ نے 2009 میں ہدایت دی تھی کہ یکم اگست 2009 سے کولکاتا میٹروپولیٹن علاقے میں 15 سال سے زیادہ پرانی کسی بھی تجارتی گاڑی کو چلانے کی اجازت نہیں دی جائے گی۔

بس آپریٹرز نے حکومت اور عدالت سے اپیل کی کہ اس پالیسی پر حتمی فیصلہ لینے سے پہلے اس کے معاشی اثرات کو بھی مدنظر رکھا جائے۔ ان کا کہنا تھا کہ ہزاروں بس مالکان اور ٹرانسپورٹ شعبے سے وابستہ ملازمین اپنے خاندانوں کے ساتھ اسی شعبے پر انحصار کرتے ہیں۔

تنظیم کے نمائندے بنرجی نے کہا کہ وہ محکمہ ٹرانسپورٹ سے اپیل کر رہے ہیں کہ ایسی پرانی گاڑیوں کو اسکریپ نہ کیا جائے جن سے نکلنے والا دھواں مقررہ آلودگی کی حد کے اندر ہے اور جو طے شدہ رہنما اصولوں پر پورا اترتی ہیں۔

انہوں نے مطالبہ کیا کہ 15 سال کی عمر پوری کرچکی ان گاڑیوں کو بھی کولکاتا اور کولکاتا میٹروپولیٹن علاقے کی سڑکوں پر چلانے کی اجازت دی جائے۔ بس آپریٹرز نے 15 سال پرانی بسوں کو مکمل طور پر اسکریپ کرنے کے بجائے ان کے انجن تبدیل کرنے یا انہیں اپ گریڈ کرنے کی تجویز دی۔ ساتھ ہی انہوں نے آلودگی کے اصل ذرائع کو براہِ راست نشانہ بنانے والے اقدامات نافذ کرنے کا مطالبہ کیا۔