کولکاتا: مغربی بنگال کے وزیر اعلیٰ شوبھندو ادھیکاری نے ہفتے کے روز کہا کہ ان کی حکومت اسکولی نصاب میں بھارتیہ جن سنگھ کے بانی شیاما پرساد مکھرجی اور بھارت سیواشرم سنگھ کے بانی سوامی پرانوانند کی خدمات سے متعلق ابواب شامل کرے گی۔ انہوں نے کہا کہ مکھرجی اور پرانوانند کے بغیر مغربی بنگال کا وجود ہی نہیں ہوتا۔

شوبھندو نے یہاں قومی یومِ اساتذہ کے موقع پر منعقدہ ایک پروگرام سے خطاب کرتے ہوئے کہا کہ ریاست کی بھارتیہ جنتا پارٹی (بی جے پی) حکومت نے سرکاری اور امداد یافتہ اسکولوں کے لیے 300 کروڑ روپے کی ’سمگر انودان‘ یعنی مجموعی گرانٹ مختص کی ہے۔ انہوں نے کہا کہ ترنمول کانگریس کی سابقہ حکومت کے دور میں ان اسکولوں کا بنیادی ڈھانچہ اور سہولیات خراب ہوگئی تھیں، کیونکہ اس حکومت کی پوری توجہ صرف ’کھیلا‘، ’میلا‘، پوجا گرانٹ اور اماموں کے الاؤنس پر تھی۔ شوبھندو نے کہا، ’’ہم اسکولی نصاب میں شیاما پرساد مکھرجی اور سوامی پرانوانند کی خدمات اور قربانیوں کو شامل کریں گے۔

ان دونوں نے مغربی بنگال کی تشکیل میں اہم کردار ادا کیا تھا اور تقسیمِ ہند کے وقت کروڑوں ہندوؤں کی جان بچائی تھی... ہم نے ریاستی حکومت کے زیر انتظام اور سرکاری امداد حاصل کرنے والے اسکولوں میں ’وندے ماترم‘ گانا لازمی قرار دیا ہے۔‘‘ انہوں نے الزام لگایا کہ سابقہ حکومت نے خوشامد کی پالیسی کے تحت مذہبی تعلیمی اداروں میں ایک مخصوص برادری کے طلبہ کو خصوصی رعایتیں دی تھیں۔ شوبھندو نے کہا، ’’تاہم، ہم ایک جامع نقطۂ نظر اپنائیں گے۔‘‘ تعلیمی شعبے میں وسیع پیمانے پر اصلاحات کی ضرورت پر زور دیتے ہوئے انہوں نے کہا کہ اسکولوں کو ان کی کارکردگی کی بنیاد پر انعام دیا جائے گا۔

وزیر اعلیٰ نے غیر نصابی سرگرمیوں اور جسمانی تعلیم کو مضبوط بنانے کی ضرورت پر بھی زور دیا۔ بی جے پی کے سینئر رہنما نے کہا، ’’ہم اپنے بچوں کو جسمانی اور ذہنی طور پر صحت مند رکھنے کے لیے کھو کھو اور کبڈی جیسے روایتی کھیلوں کے ساتھ ساتھ این سی سی (نیشنل کیڈٹ کور) پر بھی زور دیں گے۔‘‘ انہوں نے کولکاتا کے ایک معروف سرکاری اسکول میں حال ہی میں سانپ کے کاٹنے کے واقعے کا ذکر کرتے ہوئے کہا کہ اس سے ظاہر ہوتا ہے کہ سابقہ ترنمول کانگریس حکومت نے ’’تعلیمی اداروں میں بنیادی ڈھانچے کو بہتر بنانے کے لیے کچھ نہیں کیا۔‘‘

ریاست کے تقریباً 19 ہزار اسکولوں میں ضروری بنیادی سہولیات کی کمی کا حوالہ دیتے ہوئے شوبھندو نے کہا، ’’ہم نے اسکولوں میں سہولیات بہتر بنانے کے لیے مجموعی گرانٹ کے طور پر 300 کروڑ روپے مختص کیے ہیں۔‘‘ انہوں نے کہا، ’’ہم ہر اسکول میں مڈ ڈے میل اور صاف پینے کے پانی کی سہولت یقینی بنائیں گے۔‘‘ وزیر اعلیٰ نے کہا کہ طلبہ کو پڑھائی کے علاوہ دیگر سرگرمیوں میں حصہ لینے کی ترغیب دینے کے لیے اسکولوں میں طبلہ، ستار اور گٹار جیسے موسیقی کے آلات دستیاب کرائے جائیں گے۔ انہوں نے کہا، ’’لائبریریوں میں بڑی تعداد میں اچھی کتابیں اور وسائل فراہم کیے جائیں گے اور اسٹاف سلیکشن کمیشن (ایس ایس سی) کے ذریعے مختلف شعبوں میں زیادہ تربیت یافتہ اور اہل ملازمین کی بھرتی کی جائے گی... ہم ای-لائبریری بنانے پر بھی زور دیں گے۔‘‘ وزیر اعلیٰ نے کہا کہ لوگ 2030 تک نئی قومی تعلیمی پالیسی کے نتائج دیکھ سکیں گے۔

انہوں نے بتایا کہ ایک ہزار ثانوی اور اعلیٰ ثانوی اسکولوں میں ’اٹل ٹنکرنگ لیبز‘ قائم کی جائیں گی۔ انہوں نے کہا، ’’اگر ہم طلبہ کو صرف کتابی تعلیم تک محدود رکھیں گے تو ہم غلطی کریں گے۔‘‘ وزیر اعلیٰ نے یہ بھی کہا کہ سابقہ خامیوں کی وجہ سے ریاست کے تعلیمی نظام کے کئی پہلو متاثر ہوئے ہیں۔ شوبھندو نے خواتین کی تعلیم کو فروغ دینے والے کثیر صلاحیت کے مالک ایشور چندر ودیا ساگر اور سابق صدر جمہوریہ سروپلی رادھا کرشنن کو ان کی یوم پیدائش پر خراج عقیدت پیش کیا۔

وزیر اعلیٰ نے کہا کہ ان کے آبائی ضلع مشرقی مدنی پور میں گزشتہ نو برس کے دوران ریاست میں سب سے زیادہ کامیابی کی شرح ریکارڈ کی گئی ہے اور کئی اسکولوں کے طلبہ نے اچھی کارکردگی کا مظاہرہ کیا ہے۔ شوبھندو نے کہا کہ ان کی حکومت نے اسکولوں اور کالجوں کے ملازمین کے لیے مہنگائی الاؤنس اور پنشن کے فوائد میں بھی اضافہ کیا ہے۔ انہوں نے کہا، ’’ہم مغربی بنگال کو ایک بار پھر پہلے مقام پر قائم کریں گے۔‘‘