کولکاتا: کولکاتا کے قریب دکشنیشور کالی مندر میں منگل کی صبح پوجا کے لیے پہنچنے والے چیف الیکشن کمشنر گیانیش کمار کو لوگوں کے ایک گروہ کے احتجاج کا سامنا کرنا پڑا۔ مظاہرین نے انہیں کالے جھنڈے دکھائے اور “واپس جاؤ” کے نعرے لگائے۔ اس سے پہلے اتوار کی رات جب گیانیش کمار کولکاتا پہنچے تھے تو نیتاجی سبھاش چندر بوس انٹرنیشنل ایئرپورٹ کے باہر بھی ان کے خلاف اسی طرح کا احتجاج کیا گیا تھا۔

اس کے بعد پیر کی صبح جب وہ کالی گھاٹ مندر گئے تو وہاں بھی مظاہرین نے انہیں کالے جھنڈے دکھائے اور “واپس جاؤ” کے نعرے لگاتے ہوئے احتجاج کیا۔ ان مسلسل احتجاجی مظاہروں کے باوجود گیانیش کمار نے ریاست میں اپنے طے شدہ پروگرام جاری رکھے۔

منگل کی صبح انہوں نے ہوڑہ ضلع میں واقع بیلور مٹھ کا بھی دورہ کیا اور کہا کہ الیکشن کمیشن مغربی بنگال میں پرتشدد واقعات سے پاک انتخابات کرانے کے لیے پُرعزم ہے۔ بیلور مٹھ کے دورے کے دوران انہوں نے صحافیوں سے گفتگو کرتے ہوئے کہا: “الیکشن کمیشن اس بات کو یقینی بنانا چاہتا ہے کہ انتخابات تشدد اور خوف سے پاک ماحول میں ہوں۔” واضح رہے کہ چیف الیکشن کمشنر مغربی بنگال میں آئندہ اسمبلی انتخابات کی تیاریوں کا جائزہ لینے کے لیے یہاں آئے ہیں۔ پیر کے روز انہوں نے مختلف سیاسی جماعتوں کے ساتھ ملاقاتیں بھی کی تھیں۔