کولکاتہ: سویندوادھیکاری کے قریبی ساتھی چندر ناتھ رتھ کے قتل کے خلاف بھارتیہ جنتا پارٹی (بی جے پی) کارکنوں نے جمعرات کو مغربی مدنی پور ضلع کے سالبونی علاقے میں سڑک جام کر دی۔ رتھ کو بدھ کی رات مدھیام گرام میں نامعلوم حملہ آوروں نے گولی مار کر ہلاک کر دیا تھا۔

پولیس کے مطابق، جمعرات کو مدھیام گرام میں کشیدگی کے باوجود صورتحال پُرامن رہی، جہاں بی جے پی کارکن اور حامی رتھ کے گھر کے باہر جمع ہوئے اور ان کے قتل کے ذمہ دار افراد کو سزا دینے کا مطالبہ کرتے ہوئے نعرے بازی کی۔ پارٹی کے سینئر رہنما بھی موقع پر موجود تھے جبکہ پولیس اور مرکزی فورسز نے سخت چوکسی برقرار رکھی۔

مغربی میدنی پور کے سالبونی میں تقریباً 200 بی جے پی کارکنوں اور حامیوں نے جلتے ہوئے ٹائروں کے ساتھ ایک مرکزی سڑک کو بند کر دیا۔ انہوں نے ترنمول کانگریس پر نئی حکومت کی حلف برداری سے قبل رتھ کے قتل کی سازش رچنے کا الزام لگاتے ہوئے نعرے لگائے۔ بعد میں پولیس نے مظاہرین کو قائل کر کے تقریباً 30 منٹ سے بند سڑک کو کھلوا دیا۔

ابتدائی اطلاعات کے مطابق، موٹر سائیکل سوار حملہ آوروں نے بدھ کی رات تقریباً ساڑھے دس بجے رتھ کی گاڑی کا پیچھا کیا اور مدھیام گرام کے دولتلا علاقے کے قریب انہیں روک کر گولی مار دی، جس کے بعد وہ فرار ہو گئے۔ عینی شاہدین کا کہنا ہے کہ رتھ کی ایس یو وی کو پہلے دوہریا جنکشن کے قریب ایک چھوٹی چار پہیہ گاڑی نے روکا، جس کے بعد موٹر سائیکل سوار حملہ آور گاڑی کے قریب آئے اور رتھ پر قریب سے فائرنگ کی۔

انہوں نے بتایا کہ چار پہیہ گاڑی میں سوار افراد گاڑی چھوڑ کر موٹر سائیکل پر فرار ہو گئے۔ سویندو ادھیکاری کے ایگزیکٹو اسسٹنٹ کے طور پر کام کرنے والے رتھ پر اُس وقت حملہ ہوا جب وہ مدھیام گرام میں واقع اپنے گھر واپس جا رہے تھے۔ تاہم، سویندو ادھیکاری نے حملے کے لیے کسی تنظیم کو براہِ راست ذمہ دار ٹھہرانے سے گریز کیا اور پارٹی کارکنوں سے پولیس اور قانون نافذ کرنے والے اداروں پر بھروسہ رکھنے کی اپیل کی۔