نئی دہلی: مغربی بنگال کے وزیر اعلیٰ شوبھیندو ادھیکاری نے نیٹ (قومی اہلیت و داخلہ امتحان) کے پرچہ لیک کے خلاف نکالے گئے مارچ کے دوران صحافیوں پر ہونے والے حملوں کی مذمت کرتے ہوئے یقین دہانی کرائی ہے کہ حال ہی میں منظور کیے گئے غنڈہ ایکٹ کے تحت شرپسند عناصر کے خلاف سخت کارروائی کی جائے گی۔

وزیر اعلیٰ نے مغربی بنگال اسمبلی میں بیان دیتے ہوئے کہا کہ مرکزی وزیر تعلیم دھرمیندر پردھان کے استعفے کے مطالبے پر بائیں بازو کے طلبہ تنظیموں کی جانب سے جمعہ کو کولکاتا میں نکالے گئے احتجاجی مارچ کے دوران صحافیوں اور فوٹو جرنلسٹوں پر حملے کیے گئے۔ انہوں نے بتایا کہ موقع پر موجود تقریباً 70 ایسے افراد کی شناخت کر لی گئی ہے جن کا احتجاج سے کوئی تعلق نہیں تھا۔

انہوں نے کہا کہ ان شرپسندوں کے خلاف سخت ترین کارروائی کی جائے گی اور ان پر حال ہی میں منظور شدہ غنڈہ ایکٹ کی متعلقہ دفعات عائد کی گئی ہیں۔ وزیر اعلیٰ کے مطابق، شرپسند عناصر نے پہلے پولیس پر جوتے اور پانی کی بوتلیں پھینکیں، لیکن جب پولیس ان کے اشتعال میں نہیں آئی تو انہوں نے صحافیوں کو نشانہ بنایا۔

انہوں نے کہا کہ مغربی بنگال عوامی تحفظ و انسدادِ سماج دشمن سرگرمیاں ایکٹ 2026، جسے عام طور پر غنڈہ ایکٹ کہا جاتا ہے، کے تحت قصورواروں کے خلاف سخت قانونی کارروائی کی جائے گی۔ شوبھیندو ادھیکاری نے کہا کہ کاکروچ جنتا پارٹی (کاجپا) کے ایک خود ساختہ رکن کی جانب سے اعلان کردہ "یونائیٹڈ کاکروچ مارچ" کے بینر تلے بائیں بازو اور انتہا پسند بائیں بازو کی تنظیموں نے جمعہ کو ریلی نکالی۔

انہوں نے کہا کہ جمہوری ملک میں ہر شخص کو قانون کے دائرے میں رہتے ہوئے پرامن انداز میں اپنے جمہوری حقوق استعمال کرنے کا حق حاصل ہے۔ وزیر اعلیٰ نے مزید بتایا کہ پولیس کو واضح ہدایت دی گئی تھی کہ جب تک صورتحال قابو سے باہر نہ ہو، کوئی کارروائی نہ کی جائے۔

انہوں نے کولکاتا پولیس کی تعریف کرتے ہوئے کہا کہ شرپسند چاہتے تھے کہ پولیس لاٹھی چارج کرے، آنسو گیس کے گولے چھوڑے اور حالات بگڑ جائیں، مگر پولیس نے تحمل کا مظاہرہ کرتے ہوئے انہیں ایسا کوئی موقع نہیں دیا۔