نئی دہلی: انتخابی اصلاحات کے لیے کام کرنے والی غیر سرکاری تنظیم ایسوسی ایشن فار ڈیموکریٹک ریفارمز (اے ڈی آر) کی ایک رپورٹ کے مطابق، مغربی بنگال اسمبلی انتخابات 2026 میں 129 “ریڈ الرٹ” حلقے ہیں، جو 2021 کے مقابلے میں 17 فیصد زیادہ ہیں۔ “ریڈ الرٹ” حلقہ اُس نشست کو کہا جاتا ہے جہاں تین یا اس سے زیادہ امیدواروں نے اپنے خلاف فوجداری مقدمات ہونے کا اعلان کیا ہو۔

اے ڈی آر نے 2,920 امیدواروں کے انتخابی حلف ناموں کا تجزیہ کیا، جس سے پتہ چلا کہ 683 (23 فیصد) امیدواروں نے اپنے خلاف فوجداری مقدمات کا اعتراف کیا ہے، جبکہ 589 (20 فیصد) نے سنگین نوعیت کے مقدمات ظاہر کیے ہیں۔ 2021 کے انتخابات میں 2,130 امیدواروں میں سے 528 (25 فیصد) نے فوجداری مقدمات اور 431 (20 فیصد) نے سنگین مقدمات کا اعلان کیا تھا۔

رپورٹ کے مطابق بڑی جماعتوں میں بھارتیہ جنتا پارٹی کے سب سے زیادہ امیدوار (293 میں سے 208، یعنی 71 فیصد) ایسے ہیں جنہوں نے اپنے خلاف مقدمات ظاہر کیے۔ انڈین نیشنل کانگریس کے 293 میں سے 76 (26 فیصد)، آل انڈیا ترنمول کانگریس کے 290 میں سے 112 (39 فیصد) اور کمیونسٹ پارٹی آف انڈیا (مارکسسٹ) کے 198 میں سے 94 (47 فیصد) امیدواروں نے بھی مقدمات ظاہر کیے ہیں۔

سنگین مقدمات کے حوالے سے، بی جے پی کے 188 (64 فیصد)، کانگریس کے 63 (22 فیصد)، ترنمول کے 90 (31 فیصد) اور سی پی آئی (ایم) کے 78 (39 فیصد) امیدوار شامل ہیں۔ رپورٹ میں بتایا گیا کہ 192 امیدواروں نے خواتین کے خلاف جرائم کے مقدمات ظاہر کیے، جن میں سے 8 نے عصمت دری کے کیسز کا ذکر کیا۔

اسی طرح 35 امیدواروں پر قتل اور 185 پر قتل کی کوشش کے مقدمات درج ہیں۔ 294 میں سے 129 (44 فیصد) حلقے “ریڈ الرٹ” کی کیٹیگری میں آتے ہیں، جبکہ 2021 میں یہ تعداد 78 (27 فیصد) تھی۔ مالی حیثیت کے حوالے سے، 2,920 میں سے 629 (22 فیصد) امیدوار کروڑ پتی ہیں، جو 2021 کے 18 فیصد سے زیادہ ہے۔

ترنمول کانگریس کے 72 فیصد، بی جے پی کے 49 فیصد، کانگریس کے 29 فیصد اور سی پی آئی (ایم) کے 29 فیصد امیدواروں نے ایک کروڑ روپے سے زیادہ اثاثے ظاہر کیے ہیں۔ 2026 کے انتخابات میں فی امیدوار اوسط اثاثہ 1.27 کروڑ روپے ہے، جبکہ 2021 میں یہ 91.69 لاکھ روپے تھا۔

خواتین کی نمائندگی کے لحاظ سے، اس بار صرف 385 (13 فیصد) خواتین امیدوار میدان میں ہیں، جو 2021 کے 11 فیصد سے کچھ زیادہ ہے۔ تعلیم کے لحاظ سے، 46 فیصد امیدواروں نے اپنی تعلیم پانچویں سے بارہویں جماعت تک بتائی، جبکہ 49 فیصد نے گریجویشن یا اس سے زیادہ کی ڈگری ظاہر کی۔ عمر کے اعتبار سے، 29 فیصد امیدوار 25 سے 40 سال، 54 فیصد 41 سے 60 سال، 17 فیصد 61 سے 80 سال کے درمیان ہیں، جبکہ 4 امیدواروں کی عمر 80 سال سے زیادہ ہے۔