نئی دہلی/ آواز دی وائس
دہلی ہائی کورٹ نے ڈ ی ڈی اے (ڈیلھی ڈویلپمنٹ اتھارٹی) کی جانب سے گھروں کو منہدم کرنے کے نوٹس اور مجوزہ انہدام پر روک لگانے کی درخواست پر فیصلہ محفوظ رکھ لیا ہے۔ سماعت کے دوران ڈی ڈی اے نے انہدام کے خلاف دائر درخواستوں کی مخالفت کی۔ گزشتہ روز عام آدمی پارٹی کے رہنما امانت اللہ خان کی عرضی پر سماعت ہوئی تھی۔
درخواست گزاروں کی جانب سے پیش ہونے والے سینئر وکیل سلمان خورشید نے عدالت کو بتایا کہ ڈی ڈی اے نے جن گھروں کو نوٹس دیا ہے، وہ خسرہ نمبر 279 کی حدود سے باہر واقع ہیں، اور یہ نوٹس عمومی نوعیت کے ہیں۔ اس پر دہلی ہائی کورٹ نے کہا کہ اگر ڈی ڈی اے سپریم کورٹ کے احکامات کی خلاف ورزی کر رہا ہے تو درخواست گزار کو سپریم کورٹ جانا چاہیے۔
عدالت نے یہ بھی سوال اٹھایا کہ کیا موجودہ درخواست کو عوامی مفاد کی عرضی (پی آئی ایل ) کے طور پر سنا جا سکتا ہے؟ سلمان خورشید نے استدعا کی کہ اگر عدالت اس کو عوامی مفاد کی عرضی نہیں مانتی تو اسے عام ریٹ پٹیشن کے طور پر قبول کیا جائے اور مناسب بینچ کے سامنے پیش کیا جائے۔
عدالت کا خیال تھا کہ یہ درخواست عوامی مفاد کی عرضی کے طور پر قابلِ سماعت نہیں کیونکہ متاثرہ افراد پہلے ہی ایسی عرضیاں دائر کر چکے ہیں۔ سلمان خورشید نے عدالت سے استدعا کی کہ توڑ پھوڑ کی کارروائی پر کم از کم 7 دن کی مہلت دی جائے، جس پر عدالت نے 3 دن کے اندر نئی ریٹ پٹیشن دائر کرنے کا مشورہ دیا۔
ہائی کورٹ نے مقدمے کی نوعیت کے حوالے سے اوورلیپنگ مسائل پر تشویش ظاہر کی اور کہا کہ عوامی مفاد کی عرضی پر عمومیت کے ساتھ کوئی تحفظ کا حکم نہیں دیا جا سکتا۔ عدالت نے امانت اللہ خان کی عرضی یہ کہتے ہوئے مسترد کر دی کہ یہ درخواست کسی ایسے فرد کو دائر کرنی چاہیے جو براہِ راست متاثر ہو۔
آخر میں عدالت نے کہا کہ 3 دن میں متعلقہ حکام کے سامنے نئی درخواست داخل کرنی چاہیے، کیونکہ موجودہ عرضی سے براہ راست متاثرہ افراد کی نمائندگی نہیں ہو رہی تھی، اور عدالت کوئی عمومی حفاظتی حکم صادر نہیں کر سکتی۔
