نئی دہلی: شمال مشرقی دہلی پولیس نے ایک کروڑ روپے سے زائد مالیت کی 2.82 لاکھ ممنوعہ غیر ملکی سگریٹ ضبط کرتے ہوئے چار افراد کو گرفتار کیا ہے۔ ایک سینئر پولیس افسر نے جمعرات کو یہ جانکاری دی۔ پولیس کے مطابق یہ کارروائی دو مرحلوں میں انجام دی گئی۔ پہلے کراول نگر سے ممنوعہ غیر ملکی سگریٹ کی ایک کھیپ پکڑی گئی، جس کے بعد گرفتار ملزمان کی نشاندہی پر بدھ پور صنعتی علاقے میں واقع ایک گودام پر چھاپہ مار کر مزید سگریٹ برآمد کیے گئے۔

شمال مشرقی دہلی کے ڈپٹی کمشنر آف پولیس (ڈی سی پی) راہل الول نے بتایا کہ پولیس کو کراول نگر میں ممنوعہ غیر ملکی سگریٹ کی اسمگلنگ کی خفیہ اطلاع ملی تھی، جس کے بعد منگل کو خصوصی مہم شروع کی گئی۔ انہوں نے بتایا، "اطلاع پر کارروائی کرتے ہوئے پولیس ٹیم نے شیو وہار میں جال بچھایا۔

شام تقریباً ساڑھے چار بجے تین افراد موٹر سائیکل پر ایک بورا لے کر آئے اور گاہک کا انتظار کرنے لگے۔ جب کوئی نہیں آیا تو وہ جانے لگے، لیکن پولیس نے انہیں گرفتار کر لیا۔" گرفتار افراد کی شناخت کراول نگر کے رہائشی انکیت (35)، وشال (28) اور راہل (36) کے طور پر ہوئی ہے۔ تلاشی کے دوران ان کے قبضے سے 79 کارٹن برآمد ہوئے، جن میں انڈونیشیا میں تیار کردہ 12,640 غیر ملکی سگریٹ موجود تھیں۔

ڈی سی پی نے بتایا کہ سگریٹ کے پیکٹوں پر سگریٹ اور دیگر تمباکو مصنوعات ایکٹ (COTPA) کے تحت لازمی صحت سے متعلق انتباہ درج نہیں تھے، اس لیے انہیں ہندوستان میں فروخت نہیں کیا جا سکتا۔ پولیس نے ممنوعہ سامان کی نقل و حمل میں استعمال ہونے والی ایک موٹر سائیکل بھی ضبط کر لی۔

راہل الول نے بتایا کہ اس برآمدگی کی بنیاد پر کراول نگر تھانے میں سی او ٹی پی اے کی متعلقہ دفعات کے تحت مقدمہ درج کیا گیا۔ پوچھ گچھ کے دوران گرفتار ملزمان نے اس شخص کے بارے میں معلومات دیں جس سے وہ سگریٹ خریدتے تھے۔ اس اطلاع پر کارروائی کرتے ہوئے پولیس نے بدھ کے روز مبینہ سپلائر نیرج کپور (55) کو گرفتار کر لیا۔ بعد ازاں بدھ پور صنعتی علاقے میں واقع ایک گودام پر چھاپہ مار کر مختلف برانڈز کی 2.70 لاکھ سے زائد ممنوعہ غیر ملکی سگریٹ برآمد کی گئیں۔

پولیس کے مطابق مجموعی طور پر 2,82,640 ممنوعہ غیر ملکی سگریٹ ضبط کی گئی ہیں، جن کی مالیت ایک کروڑ روپے سے زیادہ ہے۔ پولیس اس بات کی بھی تحقیقات کر رہی ہے کہ یہ سگریٹ کہاں سے خریدی گئیں، مالی لین دین کیسے ہوا اور ممنوعہ غیر ملکی سگریٹ کی اسمگلنگ میں ملوث پورے سپلائی نیٹ ورک کا سراغ لگایا جا سکے۔