نئی دہلی: سپریم کورٹ نے جمعہ کے روز عبوری طور پر حکم دیا کہ عدالتی کارروائی کی آڈیو یا ویڈیو ریکارڈنگ کو سپریم کورٹ کے سیکریٹری جنرل یا متعلقہ ہائی کورٹ کے رجسٹرار جنرل کی پیشگی اجازت کے بغیر سوشل میڈیا یا کسی بھی دوسرے ڈیجیٹل پلیٹ فارم پر پوسٹ، ری پوسٹ یا اپ لوڈ نہیں کیا جا سکے گا۔
چیف جسٹس سوریہ کانت، جسٹس جوئی مالیا باگچی اور جسٹس وی موہنا پر مشتمل بنچ نے عدالتی کارروائی کی لائیو اسٹریمنگ اور اس کی ویڈیوز کے سوشل میڈیا پر مبینہ غلط استعمال سے متعلق دائر درخواست پر مرکزی حکومت اور دیگر فریقین سے جواب بھی طلب کیا۔
بنچ نے اپنے حکم میں کہا کہ عبوری اقدام کے طور پر عدالتی کارروائی کی آڈیو یا ویڈیو ریکارڈنگ کے کسی بھی حصے کی کلپ تیار کرنے، اس میں ترمیم کرنے، اسے پھیلانے، سوشل میڈیا یا دیگر ڈیجیٹل پلیٹ فارمز پر پوسٹ، ری پوسٹ یا اپ لوڈ کرنے کی اجازت پیشگی منظوری کے بغیر نہیں ہوگی۔
درخواست گزار کی جانب سے پیش ہونے والے سینئر وکیل وکاس سنگھ نے عدالت کی کارروائی کی ویڈیوز کے سوشل میڈیا اور دیگر پلیٹ فارمز پر مبینہ غلط استعمال کا معاملہ اٹھایا۔ سالیسٹر جنرل تشار مہتا نے بھی اس مؤقف کی تائید کرتے ہوئے کہا کہ اس معاملے میں کسی نہ کسی قسم کا ضابطہ ضرور ہونا چاہیے۔
