گواہا ٹی: آسام کے وزیر اعلیٰ ہمنت بسوا شرما نے منگل کے روز کہا کہ دھوبری ضلع میں فرقہ وارانہ تشدد کے بعد 13 جون سے نافذ "دیکھتے ہی گولی مارنے" کے احکامات درگا پوجا کے دوران بھی جاری رہیں گے۔ شرما نے کہا کہ دھوبری میں سناتن دھرم کے لوگ اقلیت میں ہیں اور شدت پسندوں سے ان کی حفاظت حکومت کی اولین ترجیح ہے۔

کوکراجھار میں ایک پروگرام کے موقع پر شرما نے کہا، دیکھتے ہی گولی مارنے کے احکامات واپس نہیں لیے گئے ہیں اور یہ بدستور نافذ رہیں گے۔ وزیر اعلیٰ نے کہا کہ دھوبری میں اس وقت کوئی بدامنی یا تشدد نہیں ہوا ہے، لیکن درگا پوجا کے دوران بھی یہ احکامات برقرار رہیں گے۔ اس سال درگا پوجا 28 ستمبر سے 2 اکتوبر تک منائی جائے گی۔ انہوں نے کہا، دھوبری میں بدامنی پھیلانے کی کوشش کرنے والے کسی بھی شخص کو سنگین نتائج کا سامنا کرنا پڑے گا۔

وزیر اعلیٰ نے 13 جون کو دھوبری کا دورہ کیا تھا اور اعلان کیا تھا کہ بنگلہ دیش کی سرحد سے متصل اس ضلع میں رات کے وقت "دیکھتے ہی گولی مارنے" کے احکامات نافذ ہوں گے، کیونکہ ایک فرقہ وارانہ گروہ بدامنی پھیلانے کی کوشش کر رہا ہے، جسے حکومت ہرگز برداشت نہیں کرے گی۔ انہوں نے 10 دن بعد دوبارہ ضلع کا دورہ کیا اور بتایا کہ 13 جون سے اب تک 150 سے زائد سماج دشمن عناصر کو گرفتار کیا گیا ہے، جن میں سے 11 ریاست سے باہر کے ہیں۔

بقرعید کے اگلے دن ضلع ہیڈکوارٹر میں ہنومان مندر کے سامنے ایک گائے کی کھوپڑی ملی۔ فرقہ وارانہ کشیدگی کے درمیان ہندو اور مسلمان دونوں برادریوں کے افراد نے امن اور ہم آہنگی کی اپیل کی۔ تاہم، اگلے دن دوبارہ مندر کے سامنے ایک گائے کا سر پایا گیا اور پتھراؤ کے واقعات پیش آئے۔

۔ 8 جون کو شرما نے کہا تھا کہ بقرعید کے تہوار کے دوران کئی مقامات پر مبینہ طور پر غیر قانونی طور پر مویشیوں کو ذبح کیا گیا اور گوشت کے کچھ حصے آسام کے مختلف مقامات پر پھینکے گئے۔ شرما نے کہا کہ حکومت ریاست میں قانون و نظم کو یقینی بنانے اور تمام فرقہ وارانہ طاقتوں کو شکست دینے کے لیے مکمل طور پر پرعزم ہے۔