نئی دہلی: آسام میں ہر سال سیلاب مصیبت کی وجہ بن کر آتا ہے لیکن اس بار آسام میں سیلاب اپنا بھیانک روپ دکھا رہا ہے۔ عالم یہ ہے کہ ریاست کے کئی گائووں میں سیلاب آ گیا ہے۔ جمنا مکھ ضلع کے دو گاؤں کے 500 سے زیادہ خاندان ریلوے ٹریک پر رہ رہے ہیں، کیونکہ یہ واحد جگہ ہے جو سیلابی پانی میں نہیں ڈوبی ہے۔

چنگجورائی اور پاٹیا پتھر گاؤں کے لوگ سیلاب میں تقریباً اپنا سب کچھ کھو جانے کے بعد بہت بے بس نظر آ رہے ہیں۔ ترپال کی چادروں سے بنے کیمپ میں پناہ لینے والے دیہاتیوں کا دعویٰ ہے کہ گزشتہ پانچ دنوں میں انہیں ریاستی حکومت اور ضلع انتظامیہ سے زیادہ مدد نہیں ملی ہے۔

۔ 43 سالہ منورہ بیگم اپنے خاندان کے ساتھ ایک عارضی جگہ پر رہ رہی ہیں جب پٹیا پتھر گاؤں میں ان کا مکان سیلاب میں تباہ ہو گیا تھا۔ سیلاب سے بچنے کے لیے چار دیگر خاندان بھی ان کے ساتھ شامل ہو گئے ہیں، وہ سب اس مشکل کی گھڑی میں ایک ہی ترپال کے نیچے زندگی گزار رہے ہیں، ان کے پاس کھانے پینے کا سامان بھی نہیں ہے۔

منورہ بیگم نے کہا کہ تین دن تک ہم کھلے آسمان تلے رہے، پھر ہم نے کچھ پیسے ادھار لے کر یہ ترپال کی چادر خریدی، ہم پانچ خاندان ایک ہی ترپال کے نیچے رہتے ہیں، کوئی پرائیویسی نہیں ہے۔ بیوٹی بوردولوئی کا خاندان بھی چنجورائی گاؤں میں اپنا گھر کھونے کے بعد ترپال کے چھپر کے نیچے رہ رہا ہے۔

انہوں نے بتایا، "جب کہ سیلاب نے ہماری فصل کے لیے تیار دھان کو تباہ کر دیا، لیکن صورتحال اب بھی نازک ہے کیونکہ اس طرح زندہ رہنا بہت مشکل ہے۔" بوردولوئی کی ایک رشتہ دار سنندا ​​دلوئی نے کہا، "یہاں کی صورتحال انتہائی چیلنجنگ ہے، پینے کے صاف پانی کا کوئی ذریعہ نہیں ہے، ہم دن میں صرف ایک بار کھاتے ہیں، پچھلے چار دنوں میں ہمیں صرف چند چاول ملے ہیں۔"

ایک اور سیلاب متاثر نصیب الرحمن نے بتایا، "ہمیں چار دن بعد کل حکومت کی طرف سے مدد ملی۔ انہوں نے ہمیں کچھ چاول، دال اور تیل دیا، لیکن کچھ کو وہ بھی نہیں ملا۔"

آپ کو بتاتے چلیں کہ آسام میں اس وقت سیلاب کی صورتحال تشویشناک ہے، 29 اضلاع کے 2585 گاؤوں میں 8 لاکھ سے زیادہ لوگ قدرتی آفت کی لپیٹ میں ہیں۔ پری مون سون بارشوں کے باعث سیلاب اور لینڈ سلائیڈنگ سے 14 افراد ہلاک ہو گئے ہیں۔ 86,772 افراد نے 343 ریلیف کیمپوں میں پناہ لی ہے، جبکہ 411 امدادی مراکز بھی کام کر رہے ہیں۔

فوج، نیم فوجی دستوں اور قومی اور ریاستی ڈیزاسٹر ریلیف فورسز نے سیلاب سے متاثرہ مختلف علاقوں سے کشتیوں اور ہیلی کاپٹروں کے ذریعے 21,884 لوگوں کو بچایا ہے۔