گوہاٹی: آسام کے وزیراعلیٰ ہیمنت بسوا سرما نے ہفتے کے روز کہا ہے کہ دھوبری میں فرقہ وارانہ کشیدگی کے بعد رات کے وقت دیکھتے ہی گولی مارنے کے احکامات دیے گئے تھے، اور اس سلسلے میں 38 افراد کو گرفتار کیا گیا ہے۔

ریاستی حکومت کی جانب سے جاری ایک نوٹیفکیشن میں بتایا گیا کہ دھوبری کے سینئر سپرنٹنڈنٹ آف پولیس نوین سنگھ کا تبادلہ کر دیا گیا ہے، اور ان کی جگہ ہیلاکنڈی کی سینئر پولیس افسر (ایس ایس پی) لینا ڈولے کو تعینات کیا گیا ہے۔ وزیراعلیٰ نے سوشل میڈیا پلیٹ فارم ’ایکس‘ پر ایک پوسٹ میں کہادھوبری میں گائے کے گوشت سے متعلق معاملے میں رات بھر کے دوران 38 افراد کو گرفتار کیا گیا ہے۔

وزیراعلیٰ کے مطابق، 7 جون کو عید کے دن دھوبری شہر کے ہنومان مندر کے سامنے گائے کا کٹا ہوا سر پایا گیا تھا۔ اگلے روز پھر اسی مندر کے سامنے ایسا ہی واقعہ پیش آیا، جس کے بعد علاقے میں جھڑپیں ہوئیں۔ جمعہ کے روز متاثرہ علاقوں کا دورہ کرنے کے بعد وزیراعلیٰ نے یہ تفصیلات فراہم کیں۔

انہوں نے بتایا کہ 9 جون کو ضلعی انتظامیہ نے دھوبری شہر میں دفعہ 144 (نکلس بندی) نافذ کی تھی، جسے اگلے دن حالات میں بہتری کے بعد ہٹا دیا گیا۔ وزیراعلیٰ نے کہا کہ رات کے وقت ’دیکھتے ہی گولی مارنے‘ کا حکم اس لیے دیا گیا کیونکہ ایک تنظیم بنگلہ دیش کی سرحد سے ملحق اس ضلع میں بدامنی پھیلانے کی کوشش کر رہی تھی۔ انہوں نے انکشاف کیا کہ "نوین بنگلہ" نامی تنظیم نے علاقے میں ایسے پوسٹر لگائے ہیں جن میں دھوبری کو بنگلہ دیش میں ضم کرنے کا مطالبہ کیا گیا ہے۔