نئی دہلی:ہندوستان اور پاکستان کے درمیان کشیدہ تعلقات کے باوجود، پاکستان کی ہاکی ٹیم ایشیا کپ میں شرکت کے لیے ہندوستان آ رہی ہے۔ ہندوستانی حکومت نے پاکستانی ٹیم کو ویزا جاری کرنے اور ملک میں داخلے کی اجازت دے دی ہے۔ رواں سال ایشیا کپ کا انعقاد بہار کے راجگیر میں کیا جا رہا ہے، جو 27 اگست سے 7 ستمبر تک کھیلا جائے گا۔

ٹائمز آف انڈیا کی رپورٹ کے مطابق، وزارتِ داخلہ، وزارتِ خارجہ اور وزارتِ کھیل — تینوں نے پاکستان کی ہاکی ٹیم کو ہندوستان آنے کی منظوری دے دی ہے، جبکہ پاکستانی کھلاڑیوں کے ویزا کی کارروائی بھی شروع ہو چکی ہے۔ واضح رہے کہ پہلگام میں ہوئے دہشت گرد حملے اور آپریشن سندور کے بعد دونوں ممالک کے تعلقات مزید خراب ہو گئے تھے، جس کے بعد پاکستان کی شرکت پر خدشات پیدا ہو گئے تھے۔

تاہم، موجودہ حالات میں ہندوستان نے نرمی کا مظاہرہ کرتے ہوئے پاکستانی ٹیم کو آنے کی اجازت دے دی ہے۔ وزارتِ کھیل کے ایک ذریعے نے بتایا کہ ہم کسی بھی ملک کی ٹیم کو ہندوستان میں ہونے والے کثیر ملکی مقابلوں میں شرکت سے نہیں روکتے۔

البتہ، دو طرفہ سیریز ایک الگ معاملہ ہے۔ پاکستان کی ہاکی ٹیم ایشیا کپ اور جونیئر ورلڈ کپ کے لیے ہندوستان آ رہی ہے کیونکہ دیگر ممالک کی ٹیمیں بھی حصہ لے رہی ہیں، اور تمام متعلقہ وزارتوں سے منظوری حاصل کی جا چکی ہے۔

ہندوستان کو اولمپک چارٹر پر عمل کرنا ہے، اس لیے ہم کسی بھی ملک کو روک نہیں سکتے۔ یہ فیصلہ ہندوستان کی اس پالیسی کا حصہ ہے جس کے تحت سیاست اور کھیل کو الگ رکھنے کی کوشش کی جاتی ہے، اور اولمپک چارٹر کی ان شقوں پر عمل کیا جاتا ہے جن میں تمام رکن ممالک کے درمیان شمولیت اور ہم آہنگی کی بات کی گئی ہے، چاہے ان کے سیاسی پس منظر جیسے بھی ہوں۔

اگر ہندوستان نے پاکستان کو ایشیا کپ اور جونیئر ہاکی ورلڈ کپ میں شرکت سے روک دیا ہوتا، تو ممکن تھا کہ اسے بین الاقوامی اولمپک کمیٹی کی جانب سے پابندی کا سامنا کرنا پڑتا۔ یہ فیصلہ نہ صرف ہندوستان کے کھیلوں کے عالمی مقام کو محفوظ رکھنے کا ذریعہ ہے، بلکہ اس بات کا بھی اشارہ ہے کہ کچھ معاملات میں سیاسی کشیدگی کے باوجود کھیل کو تعلقات کی بہتری کے لیے استعمال کیا جا سکتا ہے۔