نئی دہلی/ آواز دی وائس
سندھ طاس معاہدے کو لے کر پاکستان کے وزیرِ اعظم شہباز شریف کی جانب سے ہندوستان کو دی گئی نئی دھمکی کے جواب میں، اے آئی ایم آئی ایم کے سربراہ اور حیدرآباد سے ممبر پارلیمنٹ اسدالدین اویسی نے پڑوسی ملک کے رہنما کو خبردار کرتے ہوئے کہا کہ ہمارے پاس برہموس میزائل ہے۔ انہوں نے شہباز شریف کو نصیحت دی کہ ایسی بکواس نہ کریں۔ شہباز شریف نے منگل کو کہا تھا کہ "دشمن" کو ان کے ملک کے پانی کی "ایک بوند" بھی چھیننے نہیں دی جائے گی۔
اویسی نے پاکستانی وزیرِ اعظم کے بیان پر ردعمل ظاہر کرتے ہوئے کہا کہ ہمارے پاس برہموس ہے… انہیں ایسی بکواس نہیں کرنی چاہیے۔ اس کا ہندوستان پر کوئی اثر نہیں پڑے گا۔ بس، بہت ہو گیا۔
ہندوستان نے گزشتہ دن جموں و کشمیر کے پہلگام میں ہونے والے دہشت گردانہ حملے کے بعد پاکستان کے خلاف تادیبی کارروائی کے تحت 23 اپریل کو سندھ طاس معاہدہ معطل کر دیا تھا۔ پاکستان مسلسل کہتا رہا ہے کہ ملک میں پانی کے بہاؤ کو روکنے کی کسی بھی کوشش کو جنگی کارروائی تصور کیا جائے گا۔ شہباز شریف نے کہا کہ اگر ہندوستان پانی روکنے کی کوشش کرے گا تو پھر ایسا سبق سکھایا جائے گا کہ کان پکڑ کر بیٹھ جائے گا۔
اس سے پہلے، اویسی نے پاکستانی فوج کے سربراہ عاصم منیر کی "ایٹمی" دھمکیوں پر بھی سخت ردعمل ظاہر کرتے ہوئے کہا تھا کہ ہندوستان کے خلاف استعمال کی گئی زبان قابلِ مذمت ہے۔
دوسری جانب، ایس آئی آر تنازع پر اسدالدین اویسی نے کہا کہ دلت اور مسلمان سب سے زیادہ غریب ہیں۔ اگر ان کے نام شامل نہیں کیے گئے تو کل یہی بی جے پی کہے گی کہ یہ لوگ ملک کے شہری نہیں ہیں… غریب طبقے کے لیے سب سے مشکل کام ایس آئی آر ہے… مجھے سیاسی جماعتوں کے درمیان چل رہی ان سب بے کار بحثوں سے زیادہ ایس آئی آر کی فکر ہے۔
