چنڈی گڑھ: پنجاب کے کئی اضلاع شدید تباہ کن سیلاب کی لپیٹ میں ہیں اور اس مشکل گھڑی میں ریاست کے گلوکار اور فنکار متاثرہ عوام کی مدد کے لیے آگے آئے ہیں۔ اہلکاروں نے بتایا کہ معروف گلوکار اور اداکار ستندر سر تاج نے امرتسر کے اجنالہ علاقے میں 500 خاندانوں کو ایک ماہ کا راشن فراہم کیا ہے۔

سر تاج نے ایکس (سابقہ ٹوئٹر) پر لکھا، ’’آئیے ہم ہر ممکن کوشش کریں تاکہ ہم اپنے لوگوں کے لیے اس مشکل وقت میں سہارا بن سکیں۔‘‘ ایک اور مقبول گلوکار جسبیر جسی نے سیلاب متاثرین کو ریلیف سامان پہنچانے کے لیے ایک فون نمبر جاری کیا ہے۔ جسی نے فیس بک پوسٹ میں کہا، ’’پنجاب سیلاب کی زد میں ہے اور ہر جگہ پانی ہی پانی ہے۔

ہماری ٹیمیں تیار ہیں۔ آپ کو صرف اپنی ضروریات کی تفصیل بھیجنی ہے۔ ہمیں معلوم ہوا ہے کہ پانی اور مویشیوں کے لیے چارے کی سخت ضرورت ہے۔ ہمارا نمبر ہے 98101 39792۔ آپ اپنی ضروریات اور اپنے علاقوں کی تفصیل شیئر کریں، ہماری ٹیمیں ریلیف کا انتظام کریں گی۔‘‘ ادھر اکال تخت کے جتھہ دار گیانی کلدیپ سنگھ گرگاج نے ہفتے کے روز عوام سے سیلاب متاثرین کی مدد کرنے کی اپیل کی۔

انہوں نے یہ بھی اپیل کی کہ تمام پنجابی ایک دوسرے کے ساتھ کھڑے ہوں اور ہر اس پنجابی کی مدد کریں جو مصیبت میں پھنس گیا ہے۔ گرگاج نے کہا کہ پنجاب میں بار بار آنے والے سیلاب کی اصل وجوہات کو سامنے لایا جانا چاہیے تاکہ عوام چوکس رہ سکیں اور تیار رہیں۔

پنجاب کے کئی اضلاع اس وقت شدید سیلاب کا سامنا کر رہے ہیں اور متعدد ایجنسیاں متاثرین کو راحت پہنچانے کے لیے مل کر کام کر رہی ہیں۔ ہماچل پردیش اور جموں و کشمیر کے پہاڑی علاقوں میں موسلا دھار بارش کے باعث ستلج، بیاس اور راوی دریاؤں کے ساتھ ساتھ موسمی ندی نالوں میں پانی کی سطح خطرناک حد تک بڑھ گئی ہے۔