نئی دہلی: قومی انسانی حقوق کمیشن (این ایچ آر سی) نے بدھ کے روز کہا ہے کہ اس نے اشوکا یونیورسٹی کے ایک ایسوسی ایٹ پروفیسر کی گرفتاری اور انہیں حراست میں بھیجے جانے کے معاملے میں ہریانہ کے پولیس سربراہ کو نوٹس جاری کیا ہے اور ایک ہفتے کے اندر رپورٹ طلب کی ہے۔

این ایچ آر سی نے ایک بیان میں کہا کہ اس نے اس گرفتاری سے متعلق خبر کا از خود نوٹس لیا ہے۔ کمیشن نے کہا کہ خبر میں ان الزامات کا خلاصہ ہے جن کی بنیاد پر انہیں گرفتار کیا گیا ہے، اور یہ خبر ابتدائی نظر میں یہ ظاہر کرتی ہے کہ متعلقہ پروفیسر کے انسانی حقوق اور آزادی کی خلاف ورزی ہوئی ہے۔

اشوکا یونیورسٹی کے شعبۂ علومِ سیاسیات کے سربراہ علی خان محمودآباد کے وکیل اور پولیس نے اس سے قبل بتایا تھا کہ آپریشن سندور سے متعلق سوشل میڈیا پوسٹ کرنے کے بعد، جس میں ہندوستان کی خودمختاری اور سالمیت کو خطرے میں ڈالنے جیسے سنگین الزامات شامل ہیں، ان کے خلاف دو ایف آئی آر درج کی گئیں اور اتوار کے روز انہیں گرفتار کر لیا گیا۔

واضح رہے کہ جموں و کشمیر کے پہلگام میں 22 اپریل کو دہشت گردانہ حملے کے بعد ہندوستانی مسلح افواج نے آپریشن سندور کے تحت پاکستان اور اس کے زیرِ قبضہ کشمیر میں دہشت گرد ٹھکانوں کو نشانہ بنایا تھا۔ این ایچ آر سی نے کہا کہ اس نے 20 مئی کو یہ خبر دیکھی کہ ہریانہ میں اشوکا یونیورسٹی (ایک تسلیم شدہ یونیورسٹی) کے ایک پروفیسر کو گرفتار کر کے حراست میں بھیج دیا گیا ہے۔

کمیشن نے کہا کہ یہی وجہ ہے کہ اس نے اس مبینہ واقعے کا از خود نوٹس لینا مناسب سمجھا۔ اس کے مطابق، کمیشن نے ہریانہ کے ڈائریکٹر جنرل آف پولیس کو نوٹس جاری کرتے ہوئے ایک ہفتے کے اندر تفصیلی رپورٹ پیش کرنے کا حکم دیا ہے۔