نئی دہلی – جماعت اسلامی ہند کے امیر سید سعادت اللہ حسینی نے بریلی میں معروف عالم دین مولانا توقیر رضا خان کی گرفتاری اور متعدد دیگر افراد کی پولیس حراست کو انتہائی تشویشناک معاملہ قرار دیتے ہوئے کہا ہے کہ یہ قدم ہمارے ملک کو فرقہ وارانہ سیاست اور نفرت پر مبنی طرزِ حکمرانی کی طرف دھکیلنے کی خطرناک علامت ہے۔

اپنے بیان میں انہوں نے کہا کہ یہ سب ایک سادہ اور پُرامن نعرے "آئی لو پروفیٹ محمد ﷺ"سے شروع ہوا، جو محض عقیدت اور محبت کے اظہار کا ذریعہ تھا۔ لیکن بد نیتی کے تحت اس نعرے کو عوامی نظم و ضبط کے لیے خطرہ قرار دے کر بے قصور افراد کے خلاف ایف آئی آر درج کی گئیں اور ان کی اجتماعی گرفتاریاں عمل میں لائی گئیں۔

سید سعادت اللہ حسینی نے اس عمل کو نہ صرف غیر منصفانہ قرار دیا بلکہ کہا کہ یہ ہندوستان کی تہذیبی روایت پر کھلا حملہ ہے، جس میں فرد کا احترام، مشترکہ تہذیب اور بقائے باہمی کی ضمانت شامل رہی ہے۔ انہوں نے مزید کہا کہ صدیوں سے ہندوستانی عوام نے ایک دوسرے کے مذہبی جذبات کا لحاظ رکھتے ہوئے ساتھ ساتھ زندگی گزاری ہے، اور یہ سوچنا بھی محال ہے کہ محض عقیدت کے اظہار سے سماج تقسیم ہو سکتا ہے۔ حقیقت میں، یہ پورا بحران منظم سیاسی شرانگیزی کا نتیجہ ہے۔