نیویارک/ آواز دی وائس
امریکہ میں ہندو مندروں کو مسلسل نشانہ بنایا جا رہا ہے۔ تازہ واقعہ اس ہفتے کے آغاز میں پیش آیا جب انڈیانا میں ایک ہندو مندر کو نقصان پہنچایا گیا۔ یہ واقعہ 10 اگست کو گرین وڈ سٹی میں واقع بی اے پی ایس سوامینارائن مندر میں پیش آیا۔
شکاگو میں قائم ہندوستانی قونصل خانے نے اس واقعے کا سخت نوٹس لیتے ہوئے اسے "قابلِ مذمت" قرار دیا۔ ایک بیان میں قونصل خانے نے کہا کہ مندر کے مرکزی سائن بورڈ کو مسخ کر دیا گیا ہے اور مندر کے احاطے میں شرپسندوں کے خلاف ہوشیاری برتنے کی اپیل کی گئی ہے۔
ہندوستان اور ہندو مخالف نعرے درج
ایکس پوسٹ میں کہا گیا کہ گرین وڈ، انڈیانا میں بی اے پی ایس سوامینارائن مندر کے مرکزی سائن بورڈ کی بے حرمتی قابلِ مذمت ہے۔" ساتھ ہی یہ بھی کہا گیا کہ اس نے "فوری کارروائی" کے لیے قانون نافذ کرنے والے حکام کے سامنے معاملہ اٹھایا ہے۔ مندر کے احاطے کی دیواروں پر ہندوستان اور ہندو مخالف نعرے بھی لکھے گئے۔
ایک سال میں چوتھا حملہ
ایک سال سے بھی کم عرصے میں یہ چوتھا موقع ہے جب کسی مندر پر حملہ ہوا ہو۔ یہ واقعہ کرشن جنم اشٹمی (16 اگست) سے صرف چند دن پہلے پیش آیا۔
مارچ میں، امریکہ میں اسی طرح کے ایک اور واقعے میں کیلی فورنیا میں واقع بی اے پی ایس ہندو مندر کو ایک نامعلوم شخص نے بے حرمتی کا نشانہ بنایا تھا۔ اس وقت، وزارتِ خارجہ کے ترجمان رندھیر جائسوال نے اس فعل کو "گھناؤنا" قرار دیتے ہوئے امریکی قانون نافذ کرنے والے اداروں سے مطالبہ کیا تھا کہ ذمہ دار افراد کے خلاف سخت کارروائی کی جائے۔
