پٹنہ/ آواز دی وائس

بہار میں انتخابات سے قبل وزیر اعلیٰ نتیش کمار نے ریاست کی خواتین کو ایک بڑا تحفہ دیا ہے۔ وزیر اعلیٰ نتیش نے خواتین کے لیے خاص طور پر 80 "پنک بسوں" کو ہری جھنڈی دکھائی ہے۔ یہ تمام بسیں ریاست کے مختلف اضلاع میں چلیں گی۔ اس خاص موقع پر وزیر اعلیٰ نتیش کمار نے 1065 بسوں میں ای-ٹکٹ کی سہولت بھی شروع کی ہے۔

خواتین کے لیے خاص بسیں

خواتین کے لیے شروع کی گئی ان بسوں میں کئی طرح کی خاص سہولتیں فراہم کی گئی ہیں۔ ان بسوں میں خواتین کی حفاظت کے پیش نظر سی سی ٹی وی کیمرے نصب کیے گئے ہیں جنہیں کنٹرول روم سے مانیٹر کیا جائے گا۔ ساتھ ہی حاملہ خواتین کے لیے ان بسوں میں خصوصی سہولت دی گئی ہے۔ ان بسوں میں کنڈکٹر اور ڈرائیور دونوں ہی خواتین ہوں گی۔

انتخابات سے پہلے بڑا قدم

یہ اعلان نتیش کمار کی جانب سے انتخابات سے پہلے خواتین کے لیے پہلی بار نہیں کیا گیا ہے۔ انہوں نے اتوار کو بھی ایک بڑی اسکیم کا اعلان کیا تھا جس کا نام وزیر اعلیٰ خواتین روزگار یوجنا ہے۔ اس کے تحت خواتین کو خود روزگار کے لیے 10 ہزار روپے ابتدائی مدد دی جائے گی۔ آج وزیر اعلیٰ نتیش کمار نے اس اسکیم کا باضابطہ آغاز کر دیا۔ بہار کیبنٹ نے اس اسکیم کے لیے 20 ہزار کروڑ روپے کی رقم منظور کی ہے۔ انتخابات سے پہلے اس اسکیم کو ایک "گیم چینجر" مانا جا رہا ہے۔

کس کو ملے گا فائدہ؟

اس اسکیم کا فائدہ صرف وہی خواتین اٹھا سکیں گی جو دیہی علاقوں میں "جیونیکا سیلف ہیلپ گروپ" اور شہری علاقوں میں "شہری آجیویکا مشن" کے تحت بنے سیلف ہیلپ گروپ سے جڑی ہوں گی۔ عام طور پر ایک سیلف ہیلپ گروپ میں 12 سے 15 خواتین ہوتی ہیں۔ اس گروپ میں صرف وہی خواتین شامل ہو سکتی ہیں جو انکم ٹیکس دہندہ نہ ہوں، شوہر بھی انکم ٹیکس دہندہ نہ ہو۔ عورت یا اس کے شوہر کا سرکاری ملازمت میں ہونا بھی منع ہے۔ سرکاری دفاتر میں کنٹریکٹ پر کام کرنے والی خواتین بھی اس گروپ سے نہیں جڑ پائیں گی۔

فی الحال بہار میں 1 کروڑ 40 لاکھ خواتین جیونیکا سیلف ہیلپ گروپ سے منسلک ہیں۔ نئے گروپ سے جڑنے کے لیے بھی خواتین کے درخواستیں مانگی گئی ہیں۔ دیہی علاقوں میں یہ درخواستیں قریبی گرام سنگٹھن کو دی جا سکتی ہیں، جبکہ شہری علاقوں کے لیے ایک پورٹل لانچ کیا گیا ہے۔