نئی دہلی: دہلی حکومت کی اخراجات و مالیاتی کمیٹی (ای ایف سی) نے دوارکا میں اندرا گاندھی اسپتال کمپلیکس کے اندر ایک جدید میڈیکل کالج اور طلبہ و طالبات کے لیے علیحدہ ہاسٹلز کے قیام کو منظوری دے دی ہے۔ یہ معلومات وزیر اعلیٰ کے دفتر کی جانب سے جمعرات کو جاری بیان میں دی گئی۔

وزیر اعلیٰ ریکھا گپتا نے بتایا کہ اس اہم منصوبے کی تخمینی لاگت 805.99 کروڑ روپے ہے۔ بیان کے مطابق، حال ہی میں وزیر اعلیٰ کی صدارت میں ہونے والی ای ایف سی کی میٹنگ میں اس منصوبے کی منظوری دی گئی۔ اسے 2028 تک مکمل کرنے کا ہدف رکھا گیا ہے۔ وزیر اعلیٰ نے کہا کہ اس منصوبے کے تحت میڈیکل کالج کے ساتھ طلبہ و طالبات کے لیے الگ الگ ہاسٹلز، فیکلٹی کے لیے رہائش گاہیں اور ایک جدید تعلیمی بلاک تعمیر کیا جائے گا۔

انہوں نے مزید کہا کہ یہ منصوبہ دہلی میں ڈاکٹروں کی کمی کو پورا کرنے اور صحت کے شعبے کی خدمات کو بہتر بنانے میں اہم کردار ادا کرے گا۔ ریکھا گپتا کے مطابق، میڈیکل کالج کو نیشنل میڈیکل کمیشن (این ایم سی) کے معیار کے مطابق بنایا جائے گا، جہاں سالانہ 250 ایم بی بی ایس نشستوں کی گنجائش ہوگی، جبکہ ابتدائی مرحلے میں 150 طلبہ کے ساتھ تدریس کا آغاز کیا جائے گا۔

بیان میں کہا گیا ہے کہ اس منصوبے کی تعمیر پبلک ورکس ڈیپارٹمنٹ (پی ڈبلیو ڈی) کرے گا جبکہ صحت اور خاندانی بہبود کا محکمہ اس کی نگرانی کرے گا۔ وزیر اعلیٰ نے افسران کو ہدایت دی کہ منصوبے کی معیار اور مقررہ مدت پر سختی سے عمل کیا جائے۔ انہوں نے کہا کہ یہ منصوبہ مرحلہ وار مکمل کیا جائے گا، جس کے پہلے مرحلے میں تعلیمی بلاک، طلبہ کے ہاسٹلز اور اساتذہ کی رہائش گاہیں تعمیر کی جائیں گی۔