نئی دہلی: قومی دارالحکومت کی ایک عدالت نے 2020 کے دہلی فسادات کے دوران انٹیلی جنس بیورو (آئی بی) کے افسر انکت شرما کے قتل کے مقدمے میں عام آدمی پارٹی کے سابق کونسلر طاہر حسین سمیت پانچ مجرموں کو جمعہ کے روز عمر قید کی سزا سنائی۔

ایڈیشنل سیشن جج پروین سنگھ نے پانچوں مجرموں کو سزا سناتے ہوئے کہا کہ استغاثہ یہ ثابت نہیں کر سکا کہ ان مجرموں کی اصلاح کی کوئی گنجائش نہیں ہے، اس لیے انہیں سزائے موت نہیں دی جا سکتی۔ سخت سکیورٹی انتظامات کے درمیان طاہر حسین اور دیگر مجرموں کی موجودگی میں فیصلہ سنایا گیا۔ عدالت کا کمرہ کھچا کھچ بھرا ہوا تھا، جہاں وکلا کے علاوہ دہلی پولیس کے اعلیٰ افسران، جن میں کرائم برانچ کے جوائنٹ کمشنر اور ڈی سی پی بھی شامل تھے، موجود تھے۔

اس سے قبل دہلی پولیس نے پانچوں مجرموں کے لیے سزائے موت کا مطالبہ کرتے ہوئے کہا تھا کہ انکت شرما پر مسلسل حملہ کرتے ہوئے وہ "جانوروں کی سطح" تک گر گئے تھے۔ خصوصی سرکاری وکیل مدھوکر پانڈے نے عدالت میں کہا تھا کہ انکت شرما کو انتہائی بے رحمی سے قتل کیا گیا اور مجرموں نے ان پر کوئی رحم نہیں کیا، اس لیے انہیں بھی کسی قسم کی رعایت نہیں ملنی چاہیے۔

انہوں نے مزید کہا تھا کہ جو لوگ آج رحم کی اپیل کر رہے ہیں، انہیں خود بھی رحم کا مظاہرہ کرنا چاہیے تھا۔ انکت شرما پر کسی نے ترس نہیں کھایا اور نہ ہی انہیں اسپتال پہنچانے کی کوشش کی گئی۔ عدالت نے 13 جولائی کو طاہر حسین اور چار دیگر کو انکت شرما کے قتل کا قصوروار قرار دیا تھا۔

فسادات کے دوران ہجوم کے حملے کے بعد انکت شرما کی لاش بعد میں ایک نالے سے برآمد ہوئی تھی۔ اپنے فیصلے میں عدالت نے قرار دیا کہ طاہر حسین ایک ایسے مسلح ہجوم کا رکن تھا جو ہندوؤں کے خلاف بدنیتی کے ساتھ فساد، آتش زنی اور لوٹ مار کی نیت سے جمع ہوا تھا، اور اسی حملے کے دوران انکت شرما کو قتل کیا گیا۔