امراوتی: آندھرا پردیش میں بدھ کے روز مکر سنکرانتی سے ایک دن قبل بھوگی کا تہوار مکمل مذہبی عقیدت اور روایتی جوش و خروش کے ساتھ منایا گیا۔ فصلوں کے تہوار کے آغاز کی علامت اس موقع پر مندروں، دیہات اور قصبوں میں الاؤ جلائے گئے۔

تروپتی کے تروُملا شری وینکٹیشور مندر کے احاطے میں روحانی شان و شوکت دیکھنے کو ملی، جہاں تروُملا تروپتی دیوستھانم (ٹی ٹی ڈی) نے صدیوں پرانی روایات کے مطابق شری واری مندر کے اندر اور اطراف میں روایتی بھوگی آگ کا اہتمام کیا۔

ٹی ٹی ڈی کے ایک عہدیدار نے بدھ کے روز ‘پی ٹی آئی-بھاشا’ کو بتایا، ’’جیسے ہی سنکرانتی تہوار کا آغاز ہوا، ملک بھر سے عقیدت مند پہاڑی مندر کی جانب امڈ آئے اور بھگوان وینکٹیشور کے درشن کے بعد کئی لوگوں نے خوشی اور روحانی اطمینان کا اظہار کیا۔‘‘ پرکاشم ضلع اور دیگر اضلاع میں لوگوں نے علی الصبح روایتی الاؤ جلا کر بھوگی تہوار منایا، جو پرانی اور غیر ضروری چیزوں کو ترک کر کے نئی شروعات کا خیرمقدم کرنے کی علامت ہے۔

متعدد باشندوں نے ‘پی ٹی آئی-بھاشا’ سے گفتگو میں بتایا کہ وہ اپنے اہلِ خانہ کے ساتھ سنکرانتی منانے کے لیے دور دراز علاقوں سے اپنے آبائی مقامات پر لوٹے ہیں۔ سنکرانتی کی تقریبات کے درمیان آہستہ آہستہ معدوم ہوتی جا رہی ہری داسو روایت کو پرکاشم ضلع کے گنگادیوی پَلّے گاؤں میں تقریباً 10 ہری داسو خاندان محفوظ رکھے ہوئے ہیں، جو روزی روٹی کی تلاش میں سنکرانتی کے دوران قصبوں اور شہروں کا سفر کرتے ہیں۔

گزشتہ 18 برسوں سے ہری داسو روایت نبھانے والے ہری داسو مستان نے بتایا کہ وہ روایتی لباس میں گھر گھر جا کر بھجن گاتے ہیں اور لوگوں کو سنکرانتی کی آمد اور اس کی اہمیت یاد دلاتے ہیں۔ انہوں نے بالخصوص نوجوان نسل سے اس روایت کی ثقافتی اور روحانی اہمیت کو سمجھنے کی اپیل کی۔

آندھرا پردیش کے گورنر ایس عبدالنظیر نے بھی بھوگی کے موقع پر عوام کو دلی مبارکباد پیش کی۔ اپنے پیغام میں گورنر نے کہا کہ بھوگی فصلوں کے تہوار کے آغاز کی علامت ہے اور یہ نیاپن، شکرگزاری اور خوشحالی کی نمائندگی کرتا ہے، جو خطے کی زرعی روایات اور ثقافتی ورثے کی عکاسی کرتا ہے۔

انہوں نے عوام کو خوشحال اور کامیاب بھوگی تہوار کی نیک خواہشات پیش کیں۔ وائی ایس آر کانگریس پارٹی کے سربراہ اور سابق وزیر اعلیٰ وائی ایس جگن موہن ریڈی نے بھی بھوگی، سنکرانتی اور کنوما کے موقع پر عوام کو مبارکباد دی۔ ریڈی نے بدھ کے روز ‘ایکس’ پر ایک پوسٹ میں کہا،بھوگی، سنکرانتی اور کنوما کے مواقع پر ریاست کے تمام عوام کو میری نیک خواہشات۔‘