نئی دہلی: مرکزی وزیرِ داخلہ امت شاہ آئندہ دو ہفتوں کے دوران ملک کے سرحدی علاقوں کا دورہ کریں گے۔ اس دوران وہ مقامی حکام اور بارڈر سیکورٹی فورس کے سینئر افسران سے گفتگو کرکے سیکورٹی صورتحال کا جائزہ لیں گے۔ حکام نے پیر کے روز یہ جانکاری دی۔

امت شاہ پیر کے روز بیکانیر پہنچیں گے، جہاں وہ منگل کو سانچو میں واقع بارڈر سیکورٹی فورس کی سرحدی چوکی کا دورہ کریں گے۔ وہ ’’پہری سمیلن‘‘ میں شرکت کریں گے اور خواتین اہلکاروں کے لیے بیرکوں کا ورچوئل افتتاح بھی کریں گے۔

دن میں بعد ازاں وہ بیکانیر میں بارڈر سیکورٹی فورس کے سینئر افسران کے ساتھ سرحدی سیکورٹی کا جائزہ لیں گے۔ حکام نے بتایا کہ اس میٹنگ میں مرکزی وزارتِ داخلہ کے نمائندے اور پاکستان سے متصل سرحد والے پانچ اضلاع کے سینئر افسران بھی شریک ہوں گے۔

وزیرِ داخلہ 29 مئی کو گجرات کے بھج جائیں گے، جہاں وہ بارڈر سیکورٹی فورس کی ایک اور سرحدی چوکی کا دورہ کریں گے۔ جون میں اُن کے بنگلہ دیش سے ملحق ملک کی مشرقی سرحدوں کے دورے کا امکان ہے، جس کی شروعات پانچ جون کو تریپورہ کے دورے سے ہوگی۔ اس کے بعد وہ مغربی بنگال کا دورہ کریں گے۔