نئی دہلی
مرکزی وزیر داخلہ امت شاہ کا جمعہ کو تریپورہ کے ضلع گومتی میں واقع ماں تریپور سندری مندر کا مجوزہ دورہ خراب موسم کے باعث منسوخ کر دیا گیا، کیونکہ ان کا ہیلی کاپٹر پرواز نہیں بھر سکا۔ ایک سرکاری عہدیدار نے یہ معلومات فراہم کیں۔امت شاہ جمعرات کی شام اگرتلہ پہنچے تھے اور جمعہ کی صبح 524 سال قدیم تریپور سندری مندر میں درشن کرنے والے تھے۔
ضلع گومتی کے ضلع مجسٹریٹ رنکو لاتھر نے بتایا کہ خراب موسم کے باعث مرکزی وزیر داخلہ کا ماں تریپور سندری مندر کا دورہ منسوخ کر دیا گیا ہے۔
وزیر اعظم نریندر مودی نے 22 ستمبر 2025 کو ازسرِ نو تعمیر کیے گئے تریپور سندری مندر کا افتتاح کیا تھا۔ یہ مندر ہندو عقیدے کے مطابق پوجا جانے والے 51 شکتی پیٹھوں میں سے ایک ہے۔
مرکزی وزارتِ سیاحت کی تیرتھ یاترا احیا اور روحانی ورثہ فروغ اسکیم کے تحت اس مندر کی تعمیرِ نو 54 کروڑ روپے سے زائد لاگت سے مکمل کی گئی تھی۔اس کے علاوہ مرکزی وزیر داخلہ کا اگرتلہ میں مجوزہ پشپ بنتا پیلس ہوٹل کا سنگ بنیاد رکھنے کا پروگرام بھی ہے۔ وہ ہندوستان-بنگلہ دیش سرحد پر زمینی صورتحال کا جائزہ لینے کے لیے مغربی تریپورہ کے لنکامورا سرحدی چوکی کا بھی دورہ کریں گے۔
امت شاہ مغربی تریپورہ ضلع کے شالباگان میں واقع بارڈر سیکیورٹی فورس (بی ایس ایف) تریپورہ فرنٹیئر ہیڈکوارٹر میں ایک اعلیٰ سطحی سکیورٹی جائزہ اجلاس کی صدارت بھی کریں گے۔
اس اجلاس میں سرحدی انتظام کو مزید مؤثر بنانے پر خصوصی توجہ دی جائے گی۔اجلاس میں وزیر اعلیٰ مانک ساہا، چیف سیکریٹری جے کے سنہا، پولیس کے ڈائریکٹر جنرل انوراگ دھنکڑ اور دیگر اعلیٰ سکیورٹی حکام کی شرکت متوقع ہے۔
.jpg "امیت شاہ کا تریپورہ سندری مندر کا دورہ منسوخ")
