نئی دہلی: پنجاب کے لدھیانہ میں جالندھر بائی پاس چوک پر واقع ڈاکٹر بی آر امبیڈکر کے مجسمے کو کچھ نامعلوم افراد نے نقصان پہنچایا، جس کے بعد مختلف والمیکی تنظیموں کے ارکان نے بدھ کو لدھیانہ بند کا اعلان کیا۔ یہ واقعہ منگل کی شام پیش آیا، جب کچھ افراد نے مجسمے کو نقصان پہنچایا۔
اس واقعے کے بعد والمیکی برادری میں شدید غم و غصہ پھیل گیا۔ بند کے اعلان کے بعد لدھیانہ میں کئی مقامات پر بڑی تعداد میں پولیس فورس تعینات کردی گئی ہے۔ مختلف والمیکی تنظیموں کے ارکان بدھ کو جالندھر بائی پاس کے قریب جمع ہوئے، نعرے بازی کی اور مجسمے کی توڑ پھوڑ کے ذمہ دار افراد کی گرفتاری کا مطالبہ کیا۔ پولیس نے بتایا کہ ملزمان کی شناخت کرکے انہیں گرفتار کرنے کی کوششیں جاری ہیں۔ پولیس نے لوگوں سے امن و امان برقرار رکھنے کی اپیل بھی کی ہے۔
