بلرام پور: اتر پردیش کے ضلع بلرام پور میں مبینہ طور پر ہندو خاندانوں کے مذہب کی تبدیلی، لو جہاد اور ملک دشمن سرگرمیوں میں مبینہ ملوث جمٰال الدین عرف چھانگور کے معاملے کی تحقیقات کا دائرہ اب ضلع شراؤستی تک پھیل گیا ہے۔

پولیس اور انتظامیہ کی ٹیم ہفتہ کو شراؤستی کے علاقہ اکونا دیہات کے رحمان پوروا میں واقع جامعہ نوریہ فاطمہ للبنات نامی ادارے/مدرسے پہنچی۔ ایڈیشنل ڈسٹرکٹ مجسٹریٹ (اے ڈی ایم) امریندر کمار ورما کی قیادت میں ایس ڈی ایم اوم پرکاش، سی او بھنگا ستیش شرما، نائب تحصیلدار امریش کمار، ایس او جی ٹیم انچارج نتن یادو اور ایس او اکھلیش پانڈے پر مشتمل ٹیم نے مدرسے کو سیل کر دیا اور وہاں سے موجود تمام ریکارڈ اپنے ساتھ لے گئی۔

جامعہ نوریہ فاطمہ للبنات کی تعمیر سید سراج الدین ہاشمی، جو گجرات کے ضلع وڈودرا کے دھوبوئی کے رہائشی ہیں، نے 2019 میں کرائی تھی۔ یہ ایک رہائشی مدرسہ برائے طالبات تھا جہاں تقریباً 300 لڑکیاں مقیم تھیں، حالانکہ اس مدرسے کو کسی طرح کی سرکاری منظوری حاصل نہیں تھی۔ بعد میں ہاشمی نے مدرسے کے پہلو میں مزید تقریباً دو بیگھہ زمین خریدی اور وہاں نئی عمارت کی تعمیر شروع کر دی۔

یکم مئی کو ایس ڈی ایم کی جانچ کے دوران مدرسے سے کوئی ضروری دستاویزات نہیں ملے تھے، جس کے بعد 3 مئی کو ضلع مجسٹریٹ کے حکم پر مدرسہ سیل کر دیا گیا۔ چونکہ مدرسے کے احاطے میں سید سراج الدین ہاشمی کی رہائش بھی تھی، اس لیے رہائشی حصہ بعد میں کھول دیا گیا، مگر مدرسہ بدستور بند رہا۔ تحقیقات میں یہ بات سامنے آئی کہ سید سراج الدین ہاشمی کی سسرال بلرام پور کے اترولا میں ہے اور وہ آتے جاتے چھانگور کے رابطے میں آ گیا۔

بعد میں اترولا کے اس کے دوروں میں اضافہ ہوا۔ اب تحقیقاتی ٹیم چھانگور اور ہاشمی کے درمیان تعلقات کی نوعیت جاننے میں مصروف ہے۔ چھاپے کے دوران تین بینک اکاؤنٹس کا انکشاف ہوا، جن میں ایک مقامی اور دو گجرات کے ہیں۔ ان کی جانچ متعلقہ بینک اور خزانے کے افسران سے کرائی جائے گی۔ ضلع مجسٹریٹ اجے کمار دویویدی نے بتایا کہ مدرسے سے حاصل شدہ دستاویزات اردو میں ہیں، پہلے ان کا ترجمہ کرایا جائے گا، پھر تحقیقات کو آگے بڑھایا جائے گا۔

ان کا کہنا تھا کہ: مدرسے میں پڑھنے والی لڑکیاں کہاں سے آئی تھیں؟ اب وہ کہاں ہیں؟ مدرسہ بنانے کے لیے فنڈ کہاں سے آیا؟ ہاشمی اترولا کیوں آتا جاتا تھا؟ کہیں وہ کسی اور سرگرمی میں تو ملوث نہیں؟ ان تمام پہلوؤں کی جامع جانچ کرائی جائے گی۔

یہ معاملہ اس وقت اتر پردیش میں مذہب کی تبدیلی اور مدرسوں سے جڑی سرگرمیوں پر جاری بحث کے تناظر میں خاص اہمیت اختیار کر گیا ہے۔ حکومت اور سیکیورٹی ایجنسیاں اس کیس کو سنجیدگی سے لے رہی ہیں، اور توقع ہے کہ آنے والے دنوں میں مزید گرفتاریاں اور انکشافات ہو سکتے ہیں۔