پریاگ راج: الہ آباد ہائی کورٹ نے سماج وادی پارٹی (ایس پی) کے رہنما اعظم خان کو مبینہ ڈونگرپور معاملے میں بدھ کے روز ضمانت دے دی۔ اس معاملے میں ایک رہائشی کالونی کو مبینہ طور پر زبردستی خالی کرایا گیا تھا۔ رام پور کی ایم پی-ایم ایل اے (پارلیمانی-قانون ساز) عدالت نے اعظم خان کو مجرم قرار دیتے ہوئے 10 سال قید کی سزا سنائی تھی۔

جسٹس سمیر جین نے اعظم خان کی طرف سے دائر ضمانت درخواست پر یہ حکم دیا۔ اس سے قبل، 12 اگست کو عدالت نے اعظم خان اور برکت علی نامی ایک ٹھیکیدار کی ضمانت درخواست پر فیصلہ محفوظ رکھ لیا تھا۔ برکت علی نے بھی ہائی کورٹ میں ایک فوجداری اپیل دائر کی ہے۔

مبینہ ڈونگرپور معاملے میں ابرار نامی ایک شخص نے اگست 2019 میں رام پور کے گنج پولیس اسٹیشن میں اعظم خان، پولیس کے سبکدوش علاقائی افسر آلے حسن خان اور ٹھیکیدار برکت علی کے خلاف مقدمہ درج کرایا تھا۔ شکایت کنندہ نے الزام لگایا تھا کہ دسمبر 2016 میں اعظم خان، آلے حسن خان اور برکت علی نے اس کی پٹائی کی، اس کے گھر میں توڑ پھوڑ کی اور اسے جان سے مارنے کی دھمکی دی۔

اس کے ساتھ ہی ان تینوں نے اس کا گھر بھی مسمار کرا دیا تھا۔ اس معاملے میں رام پور کی ایم پی-ایم ایل اے خصوصی عدالت نے 30 مئی 2024 کو اعظم خان کو 10 سال اور برکت علی کو سات سال قید کی سزا سنائی تھی۔ ڈونگرپور بستی میں رہنے والے لوگوں نے کالونی خالی کرانے کا الزام لگاتے ہوئے 12 مقدمے درج کرائے تھے۔ یہ مقدمات گنج تھانے میں لوٹ، چوری اور مارپیٹ سمیت مختلف دفعات کے تحت درج ہوئے تھے۔