ممبئی: مہاراشٹر کے وزیر اعلیٰ دیویندر فڈنویس نے ہفتہ کے روز تمام سیاسی جماعتوں سے اپیل کی کہ بارامتی اسمبلی نشست پر ہونے والے ضمنی انتخاب میں این سی پی کے صدر اجیت پوار کی اہلیہ اور موجودہ نائب وزیر اعلیٰ سنیتراپوار کو بلا مقابلہ منتخب کرانے کے لیے حمایت دی جائے۔ یہ نشست اجیت پوار کی طیارہ حادثے میں موت کے بعد خالی ہوئی تھی۔

وزیر اعلیٰ نے مہاراشٹر کی سیاسی روایات کا احترام کرتے ہوئے سنیترہ پوار کی حمایت کے لیے اتفاقِ رائے کی ضرورت پر زور دیا۔ فڈنویس نے مثال دیتے ہوئے کہا کہ این سی پی (غیر منقسم) کے ایم ایل اے اور سابق وزیر داخلہ آر۔ آر۔ پاٹل کے انتقال کے بعد ان کی اہلیہ سمن پاٹل کو 2015 میں تاسگاؤں-کوتھے مہاکال اسمبلی حلقے سے بلا مقابلہ منتخب کیا گیا تھا۔

فڈنویس نے کہا، "تمام جماعتوں کو کشادہ دلی کا مظاہرہ کرنا چاہیے اور یہ یقینی بنانا چاہیے کہ یہ ضمنی انتخاب بلا مقابلہ ہو۔" مہاراشٹر میں برسرِ اقتدار "مہایوتی" اتحاد کی قیادت بھارتیہ جنتا پارٹی (بی جے پی) کر رہی ہے، جبکہ اس اتحاد میں این سی پی اور شیوسینا بھی شامل ہیں۔

این سی پی ذرائع کے مطابق راجیہ سبھا کی موجودہ رکن سنیترہ پوار 23 اپریل کو ہونے والے بارامتی ضمنی انتخاب کے لیے 6 اپریل کو نامزدگی داخل کریں گی۔ اجیت پوار اور چار دیگر افراد 28 جنوری کو بارامتی ہوائی پٹی کے قریب ایک طیارہ حادثے میں ہلاک ہو گئے تھے۔ وہ اپنے آبائی حلقے بارامتی سے آٹھ بار رکن اسمبلی منتخب ہوئے تھے۔

شرد پوار کی قیادت والی این سی پی (ایس پی) نے اعلان کیا ہے کہ وہ بارامتی ضمنی انتخاب میں حصہ نہیں لے گی، جبکہ اس کی اتحادی کانگریس نے کہا ہے کہ وہ انتخاب کو بلا مقابلہ نہیں ہونے دے گی۔ سنیترہ پوار نے 31 جنوری کو ریاست کی نائب وزیر اعلیٰ کے طور پر حلف لیا تھا اور 26 فروری کو متفقہ طور پر این سی پی کی صدر منتخب ہوئیں۔ بارامتی کے علاوہ اہلیانگر ضلع کی راہوری اسمبلی نشست پر بھی ضمنی انتخاب ہوگا، جو بی جے پی کے ایم ایل اے شیواجی کاردیلے کے انتقال کے باعث خالی ہوئی ہے۔