نئی دہلی/ آواز دی و ائس

دہلی پولیس کے مطابق لال رنگ کی ایک ایکو اسپورٹ کار کے حوالے سے الارٹ جاری کیا گیا ہے۔ اس اطلاع کے بعد شہر کے ہر کونے میں سرچ آپریشن جاری ہے۔ پولیس کو شبہ ہے کہ یہ کار دھماکے کے مشتبہ افراد سے منسلک ہو سکتی ہے۔ تاہم، چیکنگ کے دوران i20 کار کے ساتھ یہ گاڑی کہیں نظر نہیں آئی۔ اس کے باوجود، دہلی پولیس مسلسل چیکنگ کر رہی ہے۔ پولیس کا کہنا ہے کہ دھماکہ کرنے والے ڈاکٹر عمر نے یہ دوسری کار بھی جعلی پتے پر خریدی تھی۔

یوپی اور ہریانہ میں بھی الرٹ

دہلی پولیس نے پورے شہر میں تلاشی مہم تیز کر دی ہے۔ پولیس کی پانچ خصوصی ٹیمیں اس وقت کار کی تلاش میں مصروف ہیں۔ کار کا نمبر ڈی ایل 10سی کے 0458 بتایا گیا ہے۔ تحقیقات میں انکشاف ہوا ہے کہ i20 کے علاوہ مشتبہ افراد کے پاس ایک اور گاڑی بھی تھی۔ دہلی پولیس نے تمام تھانوں، پولیس چوکیوں اور بارڈر چیک پوسٹس کو لال رنگ کی ایکو اسپورٹ گاڑی کی تلاش میں لگا دیا ہے۔ اسی کے ساتھ، اتر پردیش اور ہریانہ پولیس کو بھی اس کار کے سلسلے میں الرٹ کر دیا گیا ہے۔

یہ گاڑی بھی عمر نے جعلی پتے پر خریدی تھی

پولیس کے مطابق، ہر لال رنگ کی ایکو اسپورٹ کار جس کا نمبر ڈی ایل 10سی کے 0458 ہے، اس کا سراغ لگانے کے احکامات جاری کر دیے گئے ہیں۔ پٹرولنگ اور ناکے پر تعینات تمام پولیس اہلکاروں کو مکمل اسلحے سے لیس کر دیا گیا ہے۔ اطلاعات کے مطابق، جس لال رنگ کی ایکو اسپورٹ گاڑی کے نام پر الرٹ جاری کیا گیا ہے، وہ بھی عمر ان نبی عرف عمر محمد نے جعلی پتے پر خریدی تھی۔

ابھی تک اس کار کا کوئی سراغ نہیں ملا ہے۔

یہ کار 2017 میں راجوری گارڈن کے پتے پر رجسٹر کی گئی تھی۔ پولیس نے ہائی الرٹ جاری کرتے ہوئے اس کی تلاش تیز کر دی ہے۔ یہ گاڑی فنانس پر لی گئی تھی اور اس کا انشورنس 15 فروری 2026 کو ختم ہوگا، جب کہ کار کی فٹنس 21 نومبر 2032 تک درست ہے۔

دھماکے کے پیچھے جیشِ محمد کا ہاتھ

دہلی لال قلعہ دھماکہ کے تار جیشِ محمد تنظیم سے جڑتے جا رہے ہیں۔ تحقیقی ایجنسیوں نے اپنی جانچ میں اب دو ٹیلیگرام گروپس کو بھی شامل کیا ہے۔ ذرائع کے مطابق، "فرزندانِ دارالعلوم (دیوبند)" اور "عمر بن خطاب" نامی گروپس سے دہشت گرد منسلک تھے۔ تحقیقات میں پتہ چلا ہے کہ پاکستان میں بیٹھے جیش کے سرغنے ان گروپس کو کنٹرول کر رہے تھے۔

لال قلعہ بم دھماکے کے ملزم ڈاکٹر عمر اور امام عرفان احمد (شپیاں) نے انہی ٹیلیگرام گروپس کے ذریعے شدت پسندی کا راستہ اختیار کیا۔ ابتدائی چیٹس کشمیر کی آزادی اور کشمیریوں پر ظلم جیسے موضوعات پر مرکوز تھیں، جو بعد میں عالمی جہاد اور انتقام کی نظریات میں تبدیل ہو گئیں۔