لکھنؤ: سماج وادی پارٹی کے صدر اکھلیش یادو نے جمعرات کو الزام عائد کیا کہ اتر پردیش میں ’فارم-7‘ کے غلط استعمال کے ذریعے اقلیتی طبقے کے ووٹروں کے نام ووٹر لسٹ سے کاٹنے کی سازش کی جا رہی ہے، اور اس معاملے میں سپریم کورٹ سے فوری نوٹس لینے کی اپیل کی۔ یادو نے الزام لگایا کہ بھارتیہ جنتا پارٹی (بی جے پی) اور اس کے اتحادی مجرموں کی طرح برتاؤ کر رہے ہیں۔

انہوں نے سوشل میڈیا پلیٹ فارم ’ایکس‘ پر ایک پوسٹ میں کہا، اتر پردیش میں بی ایل اوز کو ہراساں کر کے، دباؤ ڈال کر اور دھمکا کر پی ڈی اے (پسماندہ، دلت، اقلیت) سماج، خاص طور پر اقلیتی برادری کے ووٹروں کے ووٹ جعلی دستاویزات کی بنیاد پر کاٹنے کی سازش کی جا رہی ہے۔

یادو نے کہا، معزز سپریم کورٹ فوری طور پر اس کا نوٹس لے، کیونکہ اب کسی اور سے امید باقی نہیں رہی۔ انہوں نے ایک ویڈیو بھی شیئر کی ہے، جس میں ایک شخص خود کو بوتھ لیول آفیسر (بی ایل او) بتاتے ہوئے اپنے ساتھ ہونے والی مبینہ زیادتیوں کا ذکر کر رہا ہے۔ انہوں نے مطالبہ کیا، ایس آئی آر (خصوصی گہری نظرثانی) کے دوران ‘فارم-7’ کے غلط استعمال کو فوراً روکا جائے اور ہر ووٹر کے ووٹ دینے کے آئینی حق کا تحفظ کیا جائے۔

بی ایل اوز پر زبردستی کرنے والے مجرموں کے خلاف ایف آئی آر درج کی جائے اور فاسٹ ٹریک عدالت میں سماعت ہو۔ یادو نے کہا، جب تک کوئی درست اور شفاف نظام نہیں بن جاتا، ‘فارم-7’ کے استعمال پر پابندی لگائی جائے اور اب تک جمع کیے گئے تمام فارم منسوخ کیے جائیں۔ دعویٰ اور اعتراض کی سرگرمیوں پر فوری طور پر روک لگائی جائے۔

انہوں نے مزید کہا، ملک کے عوام کے ووٹ کاٹنے کی اس سازش کے پیچھے کون سی ملک مخالف طاقتیں سرگرم ہیں، اس کی عدالتی جانچ ہونی چاہیے۔ ملک کے ایماندار صحافی اور افسران سامنے آئیں اور ملک مخالف طاقتوں کے خلاف جدوجہد میں ہمارا ساتھ دیں۔ اتر پردیش کے سابق وزیر اعلیٰ نے کہا، پی ڈی اے پہریداروں سے اپیل ہے کہ وہ ہر جائز ووٹ بنانے اور بچانے کے کام میں پوری مستعدی کے ساتھ لگے رہیں۔

بی جے پی کی دھاندلی کو ان کی آنے والی شکست کی مایوسی سمجھیں اور بی جے پی کے گھپلوں کے ثبوت جمع کر کے ان کے خلاف ایف آئی آر کی تیاری کریں۔ انہوں نے کہا، سچ یہ ہے کہ جیسے جیسے پی ڈی اے خاندان بڑھ رہا ہے، ویسے ویسے بی جے پی خوفزدہ ہو رہی ہے۔