11 اگست :ایئر انڈیا نے پیر کو اعلان کیا کہ وہ یکم ستمبر سے بھارت اور امریکا کے دارالحکومتوں کے درمیان پروازیں بند کر دے گی۔ کمپنی نے اس فیصلے کی وجہ اپنے پرانے بوئنگ طیاروں کی مجوزہ اپ گریڈنگ کے باعث طیاروں کی کمی اور پاکستان کی فضائی حدود کی بندش کو قرار دیا۔نئی دہلی اور واشنگٹن ڈی سی کے درمیان پروازوں کی معطلی ایئر انڈیا کے لیے تازہ ترین دھچکا ہے، جو اس وقت ریگولیٹری اداروں کی سخت نگرانی میں ہے۔ یہ نگرانی احمد آباد میں جون میں پیش آنے والے حادثے کے بعد مزید بڑھ گئی، جس میں 260 افراد ہلاک ہوئے تھے۔

ایئر انڈیا نے کہا کہ بیڑے میں طیاروں کی متوقع کمی اور پاکستان کی فضائی حدود کی مسلسل بندش نے ایئر لائن کی طویل فاصلے کی پروازوں پر اثر ڈالا ہے، جس کے باعث پروازوں کے روٹ طویل ہو گئے ہیں اور آپریشنل پیچیدگیاں بڑھ گئی ہیں۔رائٹرز نے اس سے قبل رپورٹ کیا تھا کہ پاکستان کی فضائی حدود پر پابندی کے باعث ایئر انڈیا کو 12 ماہ میں تقریباً 600 ملین ڈالر کا نقصان ہو سکتا ہے۔

بھارت اور پاکستان نے اپنی اپنی فضائی حدود ایک دوسرے کے لیے اس وقت بند کر دی تھیں جب بھارتی کشمیر میں عام شہریوں پر مہلک حملے کے بعد دونوں ممالک کے تعلقات میں شدید تناؤ پیدا ہوا۔ اس واقعے نے کئی دہائیوں بعد دونوں پڑوسی ممالک کے درمیان بدترین جھڑپوں کو جنم دیا۔نئی دہلی نے اس حملے کا الزام اسلام آباد پر عائد کیا ہے، تاہم پاکستان نے ان الزامات کی تردید کی ہے۔ایئر انڈیا نے مزید کہا کہ مسافروں کو واشنگٹن ڈی سی جانے کے لیے نیویارک میں مختصر قیام کے ساتھ متبادل پروازوں کا انتخاب کرنے کی سہولت فراہم کی جائے گی۔