نئی دہلی/ آواز دی وائس

تجارت و صنعت کے وزیر پیوش گوئل نے منگل کے روز کہا کہ مصنوعی ذہانت (اے آئی) کے میدان میں بے پناہ مواقع ہیں اور اس سے ملک میں روزگار کے مواقع بڑھیں گے۔

انہوں نے یہ بھی کہا کہ میں نے اپنے دفتر سے کہا ہے کہ فیصلہ ساز سطح پر ہر شخص کے پاس اپنے فون یا لیپ ٹاپ پر اے آئی، چیٹ جی پی ٹی یا جو بھی دستیاب ہو، اس کا تازہ ترین ورژن ہونا چاہیے۔

گوئل نے یہاں ایک پروگرام میں کہا کہ لہٰذا ہم اس کا استعمال کریں گے، لیکن اس شرط کے ساتھ کہ جو بھی معلومات فراہم کی جائیں گی وہ اے آئی کی مدد سے تیار کی گئی ہوں... اور اس کی تصدیق بھی کی گئی ہو۔وزیر نے کہا کہ یہ ایک ایسا خیال ہے جس کا وقت آ گیا ہے۔انہوں نے کہا کہ ہندوستان ایک ایسا ملک ہے جو ہمیشہ نئی ٹیکنالوجی کو اپنانے کے لیے تیار رہتا ہے۔ کچھ لوگ ایسے بھی ہوں گے جو لکھیں گے کہ اے آئی جیسی ٹیکنالوجیز کا روزگار پر منفی اثر پڑے گا۔

تاہم، گوئل نے کہا کہ اس سے متاثر نہیں ہونا چاہیے۔

انہوں نے کہا کہ اے آئی کا اپنا کردار ہوگا... اے آئی کے غیر اخلاقی استعمال کا مسئلہ رہے گا، لہٰذا اسے دور کرنے کے لیے انسانی مداخلت کی ضرورت ہوگی۔ اس سے روزگار ہی میں اضافہ ہوگا۔ ہندوستان کے لوگ بہت تیز ہیں... اس لیے میں اسے ایک شاندار موقع سمجھتا ہوں۔ ہمیں اسے اپنانا چاہیے۔

وزیر نے کہا کہ غیر اخلاقی استعمال یا دیگر مسائل سامنے آنے تک کچھ وقت کے لیے رکاوٹیں آسکتی ہیں، لیکن طویل مدت میں یہ ہندوستان کے لیے بے حد فائدہ مند ہوگا۔