نئی دہلی: چیف جسٹس آف انڈیا سوریہ کانت نے بدھ کو کہا کہ عدلیہ کا بنیادی اصول یہ ہے کہ مصنوعی ذہانت (اے آئی) عدالتی استدلال کو بہتر بنا سکتی ہے، لیکن عدالتی صوابدید کی جگہ نہیں لے سکتی۔ چیف جسٹس نے بتایا کہ نئی ٹیکنالوجی کے طور پر اے آئی کو اپنانے اور اس کے استعمال کی جواب دہی کی نگرانی کے لیے ایک مستقل اعلیٰ سطحی ادارہ قائم کرنے کی تجویز دی گئی ہے۔

جرمنی کے کارلسروہے میں واقع فیڈرل کورٹ آف جسٹس کے پریزائیڈنگ جج اولرِخ ہیرمان کے ساتھ دو طرفہ ملاقات کے دوران چیف جسٹس سوریہ کانت نے کہا کہ مصنوعی ذہانت کا استعمال کچھ مخصوص معاون کاموں میں کیا جا رہا ہے۔ ان میں قانونی تحقیق، فیصلوں کا 16 زبانوں میں ترجمہ اور شہریوں کو مقدمات کی صورتحال اور عدالتی کارروائی سے متعلق معلومات فراہم کرنے کے لیے مکالماتی نظام کے طور پر اے آئی کا استعمال شامل ہے۔

انہوں نے کہا کہ ان ٹیکنالوجیز کا مقصد اگرچہ بار بار کیے جانے والے کاموں کو کم کرنا ہے، لیکن یہ عدالتی فیصلوں کا تعین نہیں کرتیں۔ انہوں نے کہا، ’’مصنوعی ذہانت عدالتی استدلال کو بہتر بنا سکتی ہے، لیکن وہ عدالتی صوابدید کی جگہ نہیں لے سکتی۔ سپریم کورٹ کی اے آئی کمیٹی کے مسودہ ضوابط میں ٹائم ٹیبل تیار کرنے، کارروائی کو تحریری شکل دینے اور ترجمے جیسے انتظامی کاموں میں اے آئی کے استعمال کی اجازت دی گئی ہے۔

تاہم گواہوں کی ساکھ، ملزم کے فرار ہونے کے خطرے، دوبارہ جرم کرنے کے امکان یا ضمانت کی اہلیت کا جائزہ لینے میں اے آئی کے استعمال پر پابندی ہے۔ اے آئی کے استعمال اور اس کی جواب دہی کی نگرانی کے لیے ایک مستقل اعلیٰ سطحی ادارہ قائم کرنے کی تجویز بھی دی گئی ہے۔‘‘

چیف جسٹس نے کہا، ’’ہم دونوں کے عدالتی نظاموں کی ایک ہی بنیادی ذمہ داری ہے: عدالتی آزادی اور عوام کا اعتماد برقرار رکھنا، ساتھ ہی اپنے اداروں کو مقدمات کے نئے طریقہ کار اور انصاف تک رسائی سے متعلق بدلتی ہوئی توقعات کے مطابق ڈھالنا۔‘

‘ انہوں نے کہا، ’’ٹیکنالوجی اور انتظامی اصلاحات اس ذمہ داری کو پورا کرنے میں مدد کر سکتی ہیں، لیکن ان میں سے کوئی بھی احتیاط کے ساتھ انصاف کرنے، انسانی فیصلہ سازی اور قانون سے وفاداری کی جگہ نہیں لے سکتی۔‘‘ چیف جسٹس نے کہا کہ سپریم کورٹ کی حالیہ خصوصی لوک عدالت ’سمادھان سماروہ‘ سمیت ادارہ جاتی ثالثی مراکز، لوک عدالتوں اور ڈیجیٹل لوک عدالتوں نے بڑے شہروں سے دور رہنے والے لوگوں کے لیے بھی باہمی سمجھوتے کے ذریعے تنازعات کے حل کی سہولت کو قابل رسائی بنایا ہے۔ انہوں نے کہا کہ ان اقدامات کو تربیت یافتہ ماہرین، مقدمات کے منتظمین اور محفوظ ڈیجیٹل نظام کی مدد حاصل ہے۔