احمد آباد/ آواز دی وائس

ایئر انڈیا کا ایک طیارہ جو جمعرات کی دوپہر احمد آباد سے لندن جا رہا تھا، پرواز بھرنے کے چند ہی منٹ بعد ایک میڈیکل کالج کے کیمپس میں گر کر تباہ ہو گیا۔ اس ہولناک حادثے میں کم از کم 265 افراد ہلاک ہو گئے۔ طیارے میں دو پائلٹ اور دس کریو ممبران سمیت 242 افراد سوار تھے۔ ہندوستان کی حکمران جماعت بی جے پی کے رہنما سی آر پاٹل کے مطابق، گجرات کے سابق وزیر اعلیٰ وجے روپانی بھی جاں بحق ہونے والوں میں شامل ہیں۔ 

ہولناک طیارہ حادثے میں 265 افراد کی موت

سرکاری حکام کے مطابق، سر دار ولبھ بھائی پٹیل انٹرنیشنل ایئرپورٹ کے قریب سول اسپتال اور بی جے میڈیکل کالج کے احاطے میں طیارہ گر کر تباہ ہوا، جو ملک کے بدترین فضائی حادثات میں سے ایک ہے۔ پولیس ڈپٹی کمشنر کانن دیسائی نے بتایا کہ 265 لاشیں سول اسپتال پہنچ چکی ہیں"۔ ایک اعلیٰ افسر کے مطابق مرنے والوں میں چار ایم بی بی ایس طالبعلم اور ایک ڈاکٹر کی اہلیہ شامل ہیں۔ دوپہر کے کھانے کے وقت طیارے کے کچھ حصے ہوسٹل کی میس سے ٹکرا گئے، جس سے کئی طلبہ متاثر ہوئے۔

غیر ملکی مسافروں کی ہلاکت

ایئر انڈیا کے مطابق، 230 مسافروں میں 169 ہندوستانی، 53 برطانوی، ایک کینیڈین اور سات پرتگالی شہری شامل تھے۔ دیگر 12 افراد میں دو پائلٹ اور دس عملہ شامل تھے۔ بچ جانے والے رمیش کو شدید زخمی حالت میں اسپتال داخل کیا گیا ہے، وہ اپنے بھائی کے ساتھ لندن جا رہا تھا۔

وزیر داخلہ کی وضاحت

مرکزی وزیر داخلہ امت شاہ نے کہا کہ ایندھن کے جلنے سے درجہ حرارت اتنا زیادہ ہو گیا تھا کہ کسی کو بچانے کی کوئی گنجائش نہیں تھی۔ شاہ نے کہا کہ طیارے میں 1.25 لاکھ لیٹر ایندھن تھا، اس لیے یہ مکمل طور پر گرم ہو گیا تھا۔ انہوں نے جاں بحق افراد کے لواحقین سے ہمدردی کا اظہار کیا اور کہا کہ مرنے والوں کی شناخت ڈی این اے ٹیسٹ کے بعد جاری کی جائے گی۔

حادثے کی وجوہات اور بلیک باکس کی تلاش

ایئر ٹریفک کنٹرول کے مطابق، طیارے نے دوپہر 1:39 پر پرواز بھری اور فوراً بعد "میے ڈے" کال دی۔ بوئنگ 787 ڈریم لائنر 600 سے 800 فٹ کی بلندی تک گیا اور فوراً نیچے گر گیا۔ بلیک باکس کی تلاش جاری ہے تاکہ معلوم کیا جا سکے کہ آخری لمحات میں کیا ہوا۔

ممکنہ تکنیکی خرابی یا پرندے سے ٹکراؤ

ماہرین کے مطابق دونوں انجنوں کی مکمل صلاحیت سے کام نہ کرنا یا پرندے سے ٹکراؤ ممکنہ وجہ ہو سکتی ہے۔ ویڈیوز میں طیارے کا لینڈنگ گیئر کھلا ہوا نظر آ رہا ہے۔ ڈی جی سی اے نے تصدیق کی کہ طیارہ پرواز کے فوراً بعد گر کر تباہ ہو گیا۔

آگ میں جھلس گئے لوگ

بچاؤ ٹیموں نے زخمیوں کو نکالنے کی کوشش کی، کئی لوگ بری طرح جھلس چکے تھے۔ قریبی عمارتوں، درختوں اور گاڑیوں کو بھی نقصان پہنچا۔ ایک ویڈیو میں دیکھا جا سکتا ہے کہ طیارے کا پچھلا حصہ ہوسٹل کی چھت سے ٹکرا رہا ہے، جہاں طلبہ کھانا کھا رہے تھے۔

۔2020 کے بعد سب سے بڑا حادثہ

یہ بوئنگ ڈریم لائنر کا پہلا حادثہ ہے۔ اس سے قبل 2020 میں کوژیکوڈ میں ایئر انڈیا ایکسپریس کا طیارہ حادثے کا شکار ہوا تھا، جس میں 21 افراد ہلاک ہوئے تھے۔

عالمی سطح پر اظہار افسوس

صدر دروپدی مرمو، وزیر اعظم نریندر مودی، برطانیہ کے بادشاہ چارلس سوم، وزیراعظم کیئر اسٹارمر، اور دیگر عالمی رہنماؤں نے افسوس کا اظہار کیا۔ وزیر اعظم مودی نے ایکس (سابقہ ٹوئٹر) پر لکھا کہ احمد آباد کا یہ سانحہ ناقابل بیان ہے، ہم غمزدہ ہیں۔

ایئر انڈیا اور حکام کی کارروائیاں

ایئر انڈیا نے متاثرین کے لواحقین کے لیے ہاٹ لائن نمبر جاری کیا ہے اور ایک ایمرجنسی سنٹر بھی قائم کر دیا ہے۔ سی ای او کیمبل ولسن نے کہا کہ  یہ ہم سب کے لیے ایک مشکل دن ہے۔ ڈی جی سی اے نے پائلٹس کے بارے میں بتایا کہ کیپٹن سمیت سبھروال کے پاس 8200 گھنٹے کا تجربہ تھا۔

عینی شاہدین کی زبانی

عینی شاہد ہریش شاہ نے بتایا کہ طیارہ بہت نیچے پرواز کر رہا تھا اور سول اسپتال و بی جے میڈیکل کالج کی رہائشی عمارتوں سے ٹکرا گیا۔ کئی افراد جھلس گئے اور اپارٹمنٹس میں آگ لگ گئی۔

بوئنگ کا بیان

بوئنگ کمپنی نے بیان میں کہا کہ وہ ایئر انڈیا سے رابطے میں ہے اور ہر ممکن مدد فراہم کرے گی۔ شناخت نہ ہو سکنے والی لاشوں کے ڈی این اے نمونے لیے جا چکے ہیں تاکہ جلد از جلد شناخت ہو سکے۔