ناگپور / آواز دی وائس

ان دنوں ناگپور میں بن رہا فلائی اوور موضوعِ بحث بنا ہوا ہے، کیونکہ یہ فلائی اوور اشوک چوک کے قریب ایک مکان کی بالکنی سے گزر رہا ہے۔ مقامی لوگ اسے آٹھواں عجوبہ قرار دے رہے ہیں اور حیرت ظاہر کر رہے ہیں کہ بالکنی کے اندر سے فلائی اوور گزارنے سے پہلے این ایچ اے آئی اور میونسپل کارپوریشن نے اس پر کارروائی کیوں نہیں کی۔ اگر یہ مکان مجاز (قانونی) ہے تو اسے حاصل کرکے مالک کو معاوضہ کیوں نہیں دیا گیا اور اگر یہ غیر مجاز ہے تو اسے توڑا کیوں نہیں گیا؟ 

۔150 سال پرانا مکان

مکان کے مالک پروین پترے اور ان کی بیٹی سِرشٹی نے بتایا کہ یہ ان کی 150 سال پرانی ملکیت ہے۔ یہاں ان کی چھٹی نسل رہتی آئی ہے۔ 25 سال پہلے اس گھر کو مرمت (رینوویٹ) کیا گیا تھا۔ ان کے گھر کی بالکنی میں سے فلائی اوور کا ایک حصہ گزر رہا ہے، لیکن انہیں اس پر کوئی اعتراض نہیں ہے۔ جب ان سے پوچھا گیا کہ کیا وہ سکیورٹی کے حوالے سے پریشان ہیں تو انہوں نے کہا کہ انہیں اس میں کوئی خطرہ محسوس نہیں ہوتا۔ جب ان سے یہ بھی پوچھا گیا کہ کیا اس مکان کا نقشہ پاس ہوا تھا اور کیا یہ بالکنی قانونی ہے تو انہوں نے اس پر گول مول جواب دیا۔

۔998 کروڑ کی لاگت سے بن رہا فلائی اوور

قابلِ ذکر ہے کہ تقریباً 9.2 کلومیٹر لمبے اس فلائی اوور کی لاگت 998 کروڑ روپے ہے۔ یہ فلائی اوور نیشنل ہائی وے اتھارٹی آف انڈیا  کی نگرانی میں تعمیر ہو رہا ہے۔ این ایچ اے آئی کے افسران نے کیمرے کے سامنے نہ آتے ہوئے بتایا کہ انہوں نے اس سلسلے میں میونسپل کارپوریشن کو اطلاع دے دی تھی۔ غیر مجاز تعمیرات کو توڑنے کی ذمہ داری ناگپور میونسپل کارپوریشن کی ہوتی ہے۔ تاہم میونسپل کارپوریشن کے افسران اس معاملے پر کچھ بھی بولنے سے کترا رہے ہیں۔

رکنِ اسمبلی نے کارروائی کی بات کہی

دوسری جانب جنوبی ناگپور کے رکنِ اسمبلی موہن مَتے نے کہا کہ انہیں بھی حیرت ہو رہی ہے کہ ابھی تک میونسپل کارپوریشن، این آئی ٹی اور این ایچ اے آئی کے افسران نے اس پر کارروائی کیوں نہیں کی۔ انہوں نے کہا کہ جو بھی افسران اس میں ملوث ہیں، انہیں فوراً معطل کیا جانا چاہیے۔ ناگپور میں ترقیاتی کام چل رہا ہے اور ان افسران کے رویّے کی وجہ سے ناگپور کا نام بدنام ہو رہا ہے۔ ان کا کہنا تھا کہ فلائی اوور بالکنی سے گزرنے سے پہلے اس مکان کے مالک کو نوٹس دے کر اسے گرا دینا چاہیے تھا۔