نئی دہلی: دہلی کے بجلی ریگولیٹری کمیشن (ڈی ای آر سی) نے شہر کی بجلی تقسیم کرنے والی کمپنیوں کو مسلسل دوسرے مہینے بھی صارفین سے آٹھ فیصد تک اضافی فیول اینڈ پاور پرچیز ایڈجسٹمنٹ سرچارج (ایف پی پی اے ایس) وصول کرنے کی اجازت دے دی ہے، جس سے بجلی کے ماہانہ بلوں میں مزید اضافہ ہو سکتا ہے۔ حکام کے مطابق گزشتہ ماہ ڈی ای آر سی نے اپریل کے لیے بھی بجلی تقسیم کار کمپنیوں (ڈسکام) کو اضافی سرچارج عائد کرنے کی منظوری دی تھی۔

اس وقت یہ شرح بی ایس ای ایس راجدھانی پاور لمیٹڈ (بی آر پی ایل) کے لیے 7.94 فیصد، بی ایس ای ایس یمنا پاور لمیٹڈ (بی وائی پی ایل) کے لیے 7.43 فیصد اور ٹاٹا پاور دہلی ڈسٹری بیوشن لمیٹڈ (ٹی پی ڈی ڈی ایل) کے لیے 6 فیصد مقرر کی گئی تھی۔ تینوں بجلی کمپنیوں نے جون اور جولائی کے لیے بھی ڈی ای آر سی سے اسی طرح کی اجازت طلب کی تھی۔

ان کا کہنا تھا کہ مئی کے دوران بجلی کی خریداری کی حقیقی لاگت موجودہ بنیادی لاگت کے مقابلے میں نمایاں طور پر بڑھ گئی ہے۔ ڈی ای آر سی کے ضوابط کے مطابق ایک بلنگ سائیکل میں وصول کیے جانے والے ایف پی پی اے ایس کی زیادہ سے زیادہ حد 10 فیصد ہے، جبکہ اس کی شرح ہر ماہ کمیشن کی جانب سے مقرر کی جاتی ہے۔

اس کا حساب صارف کے مقررہ (فکسڈ) چارج اور توانائی (انرجی) چارج کے مجموعے کے فیصد کے طور پر لگایا جاتا ہے۔ 10 جولائی کو جاری کیے گئے حکم میں ڈی ای آر سی نے کہا تھا کہ مئی کے لیے ایف پی پی اے ایس کی شرح کا حساب بی آر پی ایل کے لیے 25 فیصد، بی وائی پی ایل کے لیے 19.91 فیصد اور ٹی پی ڈی ڈی ایل کے لیے 12.21 فیصد بنتا ہے۔

کمیشن نے اپنے حکم میں بجلی تقسیم کار کمپنیوں کو 10 فیصد کی مقررہ حد کے مطابق سرچارج وصول کرنے کے ساتھ مئی کے لیے اضافی رقم وصول کرنے کی بھی اجازت دی ہے، تاکہ بجلی کی خریداری کی بڑھتی ہوئی لاگت کا کم از کم مناسب حصہ وصول کرنے میں انہیں درپیش مشکلات کا ازالہ کیا جا سکے۔