نئی دہلی: حکومت نے بتایا ہے کہ تمباکو مصنوعات پر اضافی ایکسائز ڈیوٹی اور پان مسالہ پر ہیلتھ سیس (صحت محصول) یکم فروری سے نافذ کیا جائے گا۔ وزارتِ خزانہ کی جانب سے 31 دسمبر 2025 کو جاری کردہ نوٹیفکیشنز کے مطابق، تمباکو اور پان مسالہ پر عائد کیے جانے والے نئے ٹیکس، گڈز اینڈ سروسز ٹیکس (جی ایس ٹی) کے علاوہ ہوں گے۔

یہ موجودہ معاوضہ سیس (Compensation Cess) کی جگہ لیں گے جو اس وقت ایسے ’’نقصان دہ مصنوعات‘‘ پر لگایا جا رہا ہے۔ سرکاری نوٹیفکیشن کے مطابق، یکم فروری سے پان مسالہ، سگریٹ، تمباکو اور اسی نوعیت کی دیگر مصنوعات پر 40 فیصد جی ایس ٹی عائد ہوگا، جبکہ بیڑی پر 18 فیصد جی ایس ٹی لگے گا۔

اس کے علاوہ، پان مسالہ پر صحت اور قومی سلامتی سیس نافذ کیا جائے گا، جبکہ تمباکو اور اس سے متعلق مصنوعات پر اضافی ایکسائز ڈیوٹی عائد ہوگی۔ تمباکو مصنوعات (چبانے والا تمباکو، فلٹر کھینی، زردہ خوشبودار تمباکو، گٹکھا) کے لیے ایک نیا ایم آر پی پر مبنی تشخیصی نظام متعارف کرایا گیا ہے، جس کے تحت پیکٹ پر درج خوردہ فروخت قیمت کی بنیاد پر جی ایس ٹی کی قدر طے کی جائے گی۔ گٹکھا پر 91 فیصد، چبانے والے تمباکو پر 82 فیصد اور زردہ خوشبودار تمباکو پر 82 فیصد اضافی ایکسائز ڈیوٹی عائد کی جائے گی۔

سگریٹ کی لمبائی اور فلٹر کی بنیاد پر فی 1,000 اسٹکس پر 2,050 روپے سے لے کر 8,500 روپے تک ٹیکس لگایا جائے گا۔ ایکسائز ڈیوٹی سے حاصل ہونے والی رقم کو مالیاتی کمیشن کی سفارشات کے مطابق ریاستوں کے درمیان تقسیم کیا جائے گا۔ مرکزی حکومت کی ٹیکس آمدنی قابلِ تقسیم فنڈ کا حصہ ہے، جس کا 41 فیصد ریاستوں کے ساتھ شیئر کیا جاتا ہے۔ اس کے علاوہ، پان مسالہ بنانے والی اکائیوں کی پیداواری صلاحیت پر ہیلتھ سیس عائد کیا جائے گا۔

اس سیس سے حاصل ہونے والی آمدنی کا ایک حصہ صحت سے متعلق آگاہی یا دیگر صحتی منصوبوں و سرگرمیوں کے ذریعے ریاستوں کے ساتھ شیئر کیا جائے گا۔ وزیر خزانہ نرملا سیتارمن نے گزشتہ ماہ پارلیمنٹ میں کہا تھا کہ اس ہیلتھ سیس کا مقصد قومی اہمیت کے دو شعبوں، یعنی صحت اور قومی سلامتی کے لیے ’’مخصوص اور قابلِ اندازہ وسائل کی فراہمی‘‘ کو یقینی بنانا ہے۔

فی الحال پان مسالہ، سگریٹ، چبانے والا تمباکو، سگار، حقہ، زردہ اور خوشبودار تمباکو سمیت تمام تمباکو مصنوعات پر 28 فیصد جی ایس ٹی اور مختلف شرحوں پر معاوضہ سیس عائد ہے۔ یکم فروری سے جی ایس ٹی کی شرح بڑھ کر 40 فیصد ہو جائے گی، اور اس کے ساتھ ایکسائز ڈیوٹی اور نیا سیس بھی لاگو ہوگا۔

وزارتِ خزانہ نے بدھ کے روز چبانے والے تمباکو، زردہ خوشبودار تمباکو اور گٹکھا پیکنگ مشین (پیداواری صلاحیت کے تعین اور محصول کی وصولی) قواعد، 2026 کو بھی نوٹیفائی کیا ہے۔ پارلیمنٹ نے گزشتہ ماہ پان مسالہ پر سیس اور تمباکو پر ایکسائز ڈیوٹی عائد کرنے کی منظوری دے دی تھی۔