نئی دہلی/ آواز دی وائس

ای ڈی نے غیر قانونی سٹہ بازی ایپ 1ایکس  بیٹ سے جڑے منی لانڈرنگ کیس میں بالی ووڈ سیلیبریٹی اورووشی روتیلا کو سمن جاری کیا ہے۔ انہیں آج دہلی میں ای ڈی کے دفتر میں پیش ہونے کے لیے کہا گیا ہے۔ یہ معاملہ سیلیبریٹی اینڈورسمنٹس کے ذریعے مبینہ طور پر منی لانڈرنگ اور ٹیکس کی خلاف ورزی سے جڑا ہے۔ ای ڈی اس بات کی جانچ کر رہی ہے کہ ان پروموشنل کیمپیئنز کے تحت ادائیگیاں کیسے کی گئیں اور کیا ان میں کوئی مالی بے ضابطگی شامل تھی۔

سابق ٹی ایم سی رکن پارلیمان بھی جانچ کے دائرے میں

اورووشی روتیلا کے علاوہ سابق ٹی ایم سی رکن پارلیمان مِمی چکرورتی اور کئی دیگر عوامی شخصیات بھی اس جانچ کے دائرے میں ہیں۔ ذرائع کے مطابق، ای ڈی یہ پتہ لگانے میں مصروف ہے کہ آیا ان اینڈورسمنٹ ڈیلز کے ذریعے کالے دھن کو سفید بنایا گیا تھا۔  1ایکسبیٹ  ایپ پہلے بھی کئی ملکوں میں غیر قانونی سٹہ بازی اور مالی دھوکہ دہی کے معاملوں میں تنازعات میں رہ چکی ہے۔ ہندوستان میں اس کے پرچار میں شامل شخصیات کے کردار کو لے کر اب جانچ تیز ہو گئی ہے۔

مِمی چکرورتی ای ڈی کے سامنے پیش ہوئیں

ترنمول کانگریس کی سابق رکن پارلیمان مِمی چکرورتی پیر کو مبینہ غیر قانونی سٹہ بازی ایپ سے جڑے منی لانڈرنگ معاملے میں پوچھ گچھ کے لیے ای ڈی کے سامنے پیش ہوئیں۔ چکرورتی (36) کا بیان "ون ایکس بیٹ" نامی ایک ’’غیر قانونی‘‘ سٹہ بازی ایپ کے تعلق سے پی ایم ایل اے کے تحت درج کیا گیا۔ بتایا جاتا ہے کہ سابق رکن پارلیمان اور اداکارہ کچھ اشتہارات اور مالی لین دین کے ذریعے اس ایپ سے جڑی ہوئی تھیں۔ ای ڈی پوچھ گچھ کے دوران اس ایپ سے ان کے تعلقات کے بارے میں جاننا چاہتی ہے۔

دھون اور رینا سے بھی ہو چکی ہے پوچھ گچھ

ایجنسی غیر قانونی سٹہ بازی ایپ سے جڑے کئی ایسے معاملات کی جانچ کر رہی ہے جن پر الزام ہے کہ انہوں نے کئی لوگوں اور سرمایہ کاروں سے کروڑوں روپے کی ٹھگی کی یا بھاری ٹیکس چوری کی۔ اس معاملے میں وفاقی جانچ ایجنسی پہلے بھی سابق کرکٹر سریش رینا اور شکھر دھون سے پوچھ گچھ کر چکی ہے۔ ای ڈی نے اس معاملے میں 31 سالہ اداکارہ اورووشی روتیلا اور بنگالی اداکار **انکُش ہاجرا** کو منگل کے روز بیان درج کرانے کے لیے بلایا ہے۔ روتیلا "ون ایکس بیٹ" کی ہندوستانی ایمبیسیڈر ہیں۔

ون ایکس بیٹ‘ ایپ کیا ہے، جس کی اتنی چرچا ہے؟

کمپنی کے مطابق، "ون ایکس بیٹ" ایک عالمی سطح پر تسلیم شدہ سٹہ بازی ایپ ہے جسے اس کاروبار میں 18 سال کا تجربہ ہے۔ برانڈ کے صارفین ہزاروں کھیلوں کے مقابلوں پر داؤ لگا سکتے ہیں۔ کمپنی کی ویب سائٹ اور ایپ 70 زبانوں میں دستیاب ہے۔ ایجنسی کے مطابق آنے والے دنوں میں مزید کھلاڑیوں اور مشہور شخصیات سے پوچھ گچھ کیے جانے کی امید ہے۔ مرکزی حکومت نے حال ہی میں ایک قانون لاکر اصلی پیسے والی آن لائن گیمنگ پر پابندی لگا دی ہے۔

جوا پلیٹ فارم کو بلاک کرنے کے لیے 1,524 آرڈر جاری

مارکیٹ ریسرچ کمپنیوں اور جانچ ایجنسیوں کے اندازوں کے مطابق مختلف آن لائن سٹہ بازی ایپ میں تقریباً 22 کروڑ **ہندوستانی** صارفین ہیں جن میں سے آدھے (تقریباً 11 کروڑ) باقاعدہ صارف ہیں۔ ماہرین کے مطابق، ہندوستان میں آن لائن سٹہ بازی ایپ مارکیٹ کی مالیت 100 ارب امریکی ڈالر سے زیادہ ہے اور یہ 30 فیصد کی شرح سے بڑھ رہی ہے۔ حکومت نے حال ہی میں پارلیمان کو بتایا کہ اس نے 2022 سے جون 2025 تک آن لائن سٹہ بازی اور جوا پلیٹ فارمز کو بلاک کرنے کے لیے 1,524 آرڈر جاری کیے ہیں۔