نئی دہلی: لوک سبھا میں قائدِ حزبِ اختلاف راہل گاندھی نے طلبہ پر مبینہ حملوں اور پولیس کارروائی کو لے کر پیر کے روز وزیرِ اعظم نریندر مودی کو نشانہ بنایا اور کہا کہ انہیں ملک کے طلبہ سے معافی مانگنی چاہیے۔ راہل گاندھی نے بہار میں طلبہ کے احتجاج سے متعلق ایک خبر کا حوالہ دیتے ہوئے ایکس پر اپنی پوسٹ میں کہا کہ طلبہ کے خلاف "پورا نظام ہی جان لیوا بن چکا ہے۔"

انہوں نے دعویٰ کیا کہ بہار میں احتجاج کرنے والے طلبہ پر اے کے-47 سے فائرنگ کی گئی اور سیکڑوں طلبہ کو گرفتار کرکے ان کے خلاف ایف آئی آر درج کی گئی۔ کانگریس کے سابق صدر نے وزیرِ اعظم مودی سے سوال کیا، "آپ کا وہ وعدہ کہاں گیا کہ طلبہ کے خلاف کوئی ایف آئی آر درج نہیں ہوگی اور انہیں رہا کر دیا جائے گا؟" راہل گاندھی نے الزام لگایا کہ اس کے برعکس طلبہ پر مہلک حملے کیے جا رہے ہیں اور ان کے ساتھ "بربریت" برتی جا رہی ہے۔

انہوں نے کہا کہ دہلی میں طلبہ پر پیلیٹ گن استعمال کی گئی، جبکہ بہار میں اے کے-47 کا استعمال ہوا۔ راہل گاندھی نے کہا کہ اتر پردیش، مغربی بنگال، بہار یا دہلی، ہر جگہ طلبہ کے خلاف اسی طرح کی کارروائیاں کی جا رہی ہیں۔ انہوں نے حکومت پر الزام لگایا کہ وہ "جھوٹ بولتی ہے" اور اصلاحات کرنا اس کے بس کی بات نہیں۔

انہوں نے مزید کہا کہ حکومت اپنے وعدوں سے مکر جائے گی اور ہر ممکن طریقے سے طلبہ کی آواز دبانے کی کوشش کرے گی۔ راہل گاندھی نے کہا، "مودی جی! ملک کے طلبہ سے معافی مانگیے اور جن لوگوں نے طلبہ پر حملہ کیا اور انہیں کچلا، ان کے خلاف کارروائی کیجیے، طلبہ کے خلاف نہیں۔"