سری نگر/ آواز دی وائس

جموں و کشمیر میں دہشت گردوں کی بھرتی سے متعلق ایک معاملے کی تحقیقات کے سلسلے میں کاؤنٹر انٹیلیجنس کشمیر  یونٹ وادی کے چار اضلاع میں دس مختلف مقامات پر تلاشی مہم چلا رہی ہے۔ ایک افسر کے مطابق یہ چھاپے ایک دہشت گردانہ جرم کی تفتیش کے تحت کیے جا رہے ہیں، جو سرحد پار سے جیشِ محمد کے کمانڈر عبداللہ غازی کی جانب سے چلائے جا رہے اسلیپر سیل اور بھرتی نیٹ ورک سے جڑا ہوا ہے۔ یہ تلاشی پلوامہ کے ایک مقام پر، سرینگر میں ایک جگہ اور بڈگام کے دو اضلاع میں کی جا رہی ہے۔

وزیرِ اعظم نریندر مودی کے دورۂ کشمیر سے ایک دن قبل، 5 جون 2025 کو قومی تحقیقاتی ایجنسی  نے جموں و کشمیر میں 32 مقامات پر چھاپے مارے۔ این آئی اے کے ایک ترجمان کے مطابق، کشمیر میں کی گئی یہ تلاشی پاکستان کی حمایت یافتہ ممنوعہ دہشت گرد تنظیموں اور ان کے معاونین کی جانب سے جموں و کشمیر کو غیر مستحکم کرنے کی سازش سے جڑی تفتیش کا اہم حصہ ہے۔ اس تلاشی مہم کے دوران دو زندہ کارتوس، ایک گولی کا خول اور ایک سنگین برآمد کی گئی ہے۔

کیا کچھ برآمد ہوا؟

تلاشی کے دوران کچھ ڈیجیٹل آلات بھی برآمد کیے گئے ہیں، جن میں بڑی مقدار میں قابل اعتراض ڈیٹا اور متعدد دستاویزات شامل ہیں۔ کسی بھی طرح کی دہشت گردانہ سازش کا پتہ لگانے کے لیے گہرائی سے تحقیقات کی جا رہی ہیں۔

پاکستانی حمایت یافتہ تنظیموں کے ٹھکانوں پر چھاپے

این آئی اے  کی ٹیموں نے کئی پاکستانی حمایت یافتہ تنظیموں سے وابستہ ہائبرڈ دہشت گردوں اور سرگرم کارکنوں کے ٹھکانوں پر چھاپے مارے۔ ان تنظیموں میں دی ریزسٹنس فرنٹ، یونائیٹڈ لبریشن فرنٹ جموں و کشمیر، مجاہدین غزوۃ الہند، جموں و کشمیر فریڈم فائٹرز، کشمیر ٹائیگرز، پی اے اے ایف اور دیگر شامل ہیں، جن کے مرکزی دفاتر پاکستان میں واقع ہیں۔ این آئی اے نے اطلاع دی ہے کہ یہ گروہ ممنوعہ دہشت گرد تنظیموں جیسے لشکرِ طیبہ، جیشِ محمد اور البد ر سے براہ راست طور پر منسلک ہیں۔ جن کارکنوں کے ٹھکانوں پر تلاشی لی گئی، وہ دہشت گردانہ سرگرمیوں میں ملوث ہونے کے شبہے میں این آئی اے کی تفتیش کے دائرے میں ہیں۔