نئی دہلی/ آواز دی وائس
پنجاب سے عام آدمی پارٹی (آپ) کے راجیہ سبھا ممبر راگھو چڈّھا نے سیلاب متاثرہ ریاست میں ریلیف کام کے لیے اپنے مقامی علاقائی ترقی (ایل اے ڈی) منصوبہ فنڈ سے 3.25 کروڑ روپے دینے کا اعلان کیا ہے۔ بدھ کو ایک بیان میں یہ اطلاع دی گئی۔
راجیہ سبھا ممبر کے دفتر سے جاری بیان میں کہا گیا ہے کہ انہوں نے پنجاب کے سب سے زیادہ سیلاب متاثرہ اضلاع میں سے ایک گرداسپور میں راوی ندی کے تٹ بندھ کی مرمت کے لیے 2.75 کروڑ روپے اور امرتسر میں ریلیف و بحالی کے کام کے لیے 50 لاکھ روپے منظور کیے ہیں۔
چڈّھا نے سیلاب سے متعلق واقعات میں جاں بحق ہونے والے 30 افراد کے لواحقین کے تئیں تعزیت کا اظہار کرتے ہوئے کہا کہ یہ رقم میری نہیں ہے، یہ پنجاب اور پنجابیوں کی ہے۔ ہر ایک روپیہ پنجاب کی خدمت اور تعمیرِ نو کے لیے استعمال کیا جائے گا۔ آپ کے راجیہ سبھا ممبر نے ہندوستانی فوج، بارڈر سیکیورٹی فورس (بی ایس ایف) اور پنجاب پولیس کے ساتھ ساتھ ریسکیو و ریلیف کام میں شامل افسران اور ڈاکٹروں کی کوششوں کی بھی تعریف کی۔
چڈّھا نے کہا کہ میں مرکزی حکومت سے اپیل کرتا ہوں کہ وہ پنجاب کی ہر ممکن مدد کرے۔
چڈّھا نے سوشل میڈیا پلیٹ فارم ’ایکس‘ پر ایک ویڈیو پیغام جاری کیا، جس میں پنجاب کے 23 اضلاع میں آنے والے تباہ کن سیلاب کی وجہ سے جان و مال اور فصلوں کے نقصان پر افسوس ظاہر کیا۔
انہوں نے کہا کہ میں سول سوسائٹی، غیر سرکاری تنظیموں (این جی اوز) اور ہمارے نوجوانوں کا شکریہ ادا کرتا ہوں، جو اپنی جان کی پرواہ کیے بغیر لوگوں کی خدمت کر رہے ہیں۔ یہ وہ مقدس دھرتی ہے جہاں بابا نانک نے لنگر کی رسم شروع کی تھی اور آج بھی ان کی کرپا سے پنجاب کے ہر گاؤں اور گردوارے میں لنگر پیش کیا جا رہا ہے۔
چڈّھا نے کہا کہ وہ پنجاب کے سیلاب متاثرہ علاقوں کا دورہ کریں گے اور مرکزی حکومت سے زیادہ سے زیادہ مدد دینے کی اپیل کی۔
