چندی گڑھ/ آواز دی وائس

عام آدمی پارٹی نے ہریانہ کی لینڈ پولنگ پالیسی کو لے کر بڑا الزام عائد کیا ہے۔ عام آدمی پارٹی کا کہنا ہے کہ ہریانہ کی بھارتیہ جنتا پارٹی (بی جے پی) حکومت نہ صرف کسانوں کی زمین چھین رہی ہے بلکہ ان کی پہچان اور ان کی روزی روٹی بھی ختم کرنے پر تلی ہوئی ہے۔ ای-بھومی پورٹل کے ذریعے جو کاغذی ترقی کی اسکیم چلائی جا رہی ہے، وہ اصل میں دلالوں اور بلڈر لابی کے لیے کھلی لوٹ مار کا ذریعہ بن چکی ہے۔

عام آدمی پارٹی نے اس صورتحال کے لیے ہریانہ کے انتظامی ڈھانچے کو ذمہ دار ٹھہرایا ہے۔ آپ نے کہا کہ بی جے پی حکومت نے جس طرح کسانوں کی زمینیں سرکل ریٹ سے بھی کم قیمت پر خریدنے کا منصوبہ بنایا ہے، وہ اس بات کا ثبوت ہے کہ نہ انہیں کسانوں کی فکر ہے، نہ کھیت کی اور نہ ہی ہریانہ کی زرعی تہذیب کی۔

پالیسی دلالوں کے حوالے کر دی گئی ہے– عام آدمی پارٹی

عام آدمی پارٹی نے کہا کہ 10 ایکڑ سے کم زمین رکھنے والے 90 فیصد کسانوں کو اس پالیسی سے باہر کر کے جان بوجھ کر دلالوں کے رحم و کرم پر چھوڑ دیا گیا ہے۔ زمین تو لی جا رہی ہے لیکن نہ معاوضہ مناسب ہے اور نہ ہی عمل شفاف۔ کسان کو صرف سرکل ریٹ پر دھکیلا جا رہا ہے جبکہ بازار کی قیمت اس سے تین سے چار گنا زیادہ ہے۔

عام آدمی پارٹی نے الزام لگایا کہ جن علاقوں میں ای-بھومی پورٹل کے ذریعے پالیسی نافذ کی جا رہی ہے، وہاں پہلے سے ہی بی جے پی کے وزراء اور بڑے لیڈروں نے سیکڑوں ایکڑ زمین خرید رکھی ہے۔ کیا یہ محض اتفاق ہے یا پھر اقتدار کا کھلا استحصال؟ جب کسان اپنی زمین بیچنے پر مجبور ہوگا تو سب سے پہلے انہی لیڈروں کی جیبیں بھریں گی جنہوں نے پالیسی لاگو ہونے سے پہلے ہی زمینیں خرید لی تھیں۔ یہ صرف پالیسی نہیں بلکہ پوری اقتداری ڈھانچے کو چوراہے پر لا کھڑا کرنے اور کسانوں کی لاشوں پر کاروبار کرنے کا ماڈل ہے۔

ریاست کو کارپوریٹ پروجیکٹ بنانے کی جلدبازی :  عام آدمی پارٹی

عام آدمی پارٹی کا کہنا ہے کہ وزیراعلیٰ نایاب سنگھ پورے ہریانہ کو ایک کارپوریٹ پروجیکٹ میں بدلنے کی جلدبازی میں ہیں۔ نہ انہیں گاؤں بچانے کی فکر ہے اور نہ کسانوں کی پکار سننے کا وقت۔ کسان اگر خاموش ہے تو مجبوری میں، لیکن بی جے پی کی یہ لوٹ کھسوٹ زیادہ دن نہیں چلنے والی۔ یہ وہی حکومت ہے جو تین کالے زرعی قوانین کے ذریعے دہلی کی سڑکوں پر کسانوں کو مروا دینے سے بھی نہیں ہچکی اور اب ہریانہ کی مٹی پر ان کے حق کو چھیننے نکلی ہے۔

عام آدمی پارٹی نے کہا کہ بی جے پی حکومت کو جواب دینا ہی ہوگا کہ 2014 سے اب تک کتنی زمین کسانوں سے چھینی گئی؟ کتنی زمین کس کس کارپوریٹ کو بیچی گئی؟ اور کتنے بی جے پی لیڈروں نے اسکیم لاگو ہونے سے پہلے ان علاقوں میں زمین خریدی؟ جواب دینا پڑے گا کیونکہ یہ زمین صرف ایک ٹکڑا نہیں بلکہ ہریانہ کے کسان کی روح ہے۔ اور اس روح کو کوئی حکومت، کوئی وزیراعلیٰ اور کوئی اقتداری ڈھانچہ دلالوں کے حوالے نہیں کر سکتا۔