نئی دہلی/ آواز دی وائس
عام آدمی پارٹی کے دو اہم ممبر ، سوربھ بھاردواج اور ستیندر جین کے خلاف بدعنوانی سے جڑے ایک معاملے میں مرکزی وزارت داخلہ نے تحقیقات کی منظوری دے دی ہے۔ دہلی حکومت کے محکمہ احتیاط (ویجیلنس) نے دونوں لیڈروں کے خلاف صحت کے شعبے سے وابستہ 1,000 کروڑ روپے سے زائد کے منصوبوں میں مبینہ بدعنوانیوں کے سلسلے میں تحقیقات کی اجازت مانگی تھی۔ تاہم، عام آدمی پارٹی نے ان الزامات کو مسترد کر دیا ہے۔
اس سال کے آغاز میں ہونے والے دہلی اسمبلی انتخابات میں سوربھ بھاردواج اور ستیندر جین کو شکست کا سامنا کرنا پڑا تھا، اور عام آدمی پارٹی دہلی کی حکومت سے باہر ہو گئی تھی۔ دونوں رہنماؤں کے خلاف تحقیقات کی منظوری انسداد بدعنوانی ایکٹ 1988 کے تحت دی گئی ہے۔ محکمہ احتیاط نے ایک ماہ قبل اس معاملے میں ابتدائی جانچ شروع کی تھی اور گہرائی سے تفتیش کے لیے مرکزی حکومت سے منظوری مانگی تھی۔
معاملہ کیا ہے؟
اس کیس کی شروعات دہلی اسمبلی کے موجودہ اسپیکر اور بھارتیہ جنتا پارٹی (بی جے پی) کے لیڈر وجیندر گپتا کے الزام سے ہوئی تھی۔ اگست 2024 میں انسداد بدعنوانی بیورو نے اس کی جانچ شروع کی۔ اُس وقت گپتا اسمبلی میں حزب اختلاف کے لیڈر تھے۔ ان کا الزام تھا کہ سوربھ بھاردواج اور ستیندر جین کئی بدعنوانی کے معاملات میں ملوث رہے ہیں۔
گپتا نے اپنی شکایت میں دعویٰ کیا تھا کہ جان بوجھ کر منصوبوں میں تاخیر کی گئی، جس کے سبب ان کی لاگت میں زبردست اضافہ ہوا۔ ان کے مطابق، عام آدمی پارٹی حکومت کے دوران اسپتالوں سے جڑے 24 منصوبوں کی تخمینہ لاگت 5,590 کروڑ روپے تھی، لیکن لاگت بڑھ گئی اور کوئی بھی پروجیکٹ مقررہ وقت پر مکمل نہیں ہو سکا۔
انہوں نے کہا کہ بڑے پیمانے پر عوامی پیسے کا غلط استعمال ہوا ہے۔ شکایت میں جن منصوبوں کا ذکر کیا گیا، ان میں آئی سی یو والے سات اسپتال شامل ہیں۔ مثال کے طور پر، ایل این جے پی اسپتال میں ایک نیا بلاک تعمیر ہونا تھا، جس کے لیے شروعات میں 465.22 کروڑ روپے منظور ہوئے تھے، لیکن لاگت بڑھ کر 1,125 کروڑ روپے تک پہنچ گئی، اور تین سال بعد بھی صرف 50 فیصد کام مکمل ہو پایا ہے۔
سرکاری خزانے کو نقصان
اے سی بی کی ابتدائی تحقیقات میں بھی بدعنوانی اور لاپرواہی کے اشارے ملے، جس سے سرکاری خزانے کو نقصان ہونے کی بات سامنے آئی۔ شکایت کو دہلی حکومت کے احتیاطی محکمے کے حوالے کیا گیا، جس نے مکمل تحقیقات کے بعد اپنی رپورٹ گورنر ہاؤس کو سونپ دی۔
عام آدمی پارٹی کا موقف
عام آدمی پارٹی کا کہنا ہے کہ منصوبوں میں تاخیر کو کرپشن نہیں کہا جا سکتا۔ پارٹی نے الزام لگایا کہ بی جے پی اور لیفٹیننٹ گورنر نے تاخیر کو بدعنوانی بتا کر ایک سیاسی ہتھیار بنایا اور حکومت کو مذاق کا موضوع بنا دیا۔ سوربھ بھاردواج نے کہا کہ جن منصوبوں کی بات کی جا رہی ہے، ان میں سے کسی کو بھی ان کے دور میں منظوری نہیں ملی تھی۔
حال ہی میں ہوئے اسمبلی ضمنی انتخابات کے نتائج میں عام آدمی پارٹی کو کچھ راحت ملی، جب پنجاب اور گجرات میں پارٹی نے ایک ایک سیٹ پر کامیابی حاصل کی، لیکن دہلی میں اس کے رہنماؤں کی مشکلات میں اضافہ ہوتا دکھائی دے رہا ہے۔
.gif)
.gif)
