نئی دہلی/ آواز دی وائس

پہلگام دہشت گرد حملے، آپریشن سیندور اور ہندوستان-پاکستان کشیدگی کے بعد بدھ 2 جولائی کو امریکہ کے واشنگٹن میں کواڈ گروپ کے وزرائے خارجہ کی میٹنگ ہوئی۔ اس میٹنگ کے بعد جو مشترکہ بیان جاری کیا گیا، وہ ہندوستان کے لیے ایک سفارتی کامیابی اور پاکستان کے لیے ایک دھچکا ثابت ہوا۔ کواڈ نے کہا کہ پہلگام کے مجرموں کو سخت سے سخت سزا دی جانی چاہیے۔

کواڈ کے وزرائے خارجہ کی میٹنگ کے بعد جاری کردہ بیان میں کہا گیا کہ پہلگام میں دہشت گرد حملے کو انجام دینے والے دہشت گردوں کو انصاف کے کٹہرے میں لایا جانا چاہیے اور انہیں سخت سے سخت سزا دی جانی چاہیے۔ ہندوستان، امریکہ، جاپان اور آسٹریلیا پر مشتمل عالمی گروپ کواڈ نے اس دہشت گرد حملے کی شدید مذمت کی ہے۔

کواڈ کا مشترکہ بیان کیا ہے؟

کواڈ کے مشترکہ بیان میں کہا گیا کہ کواڈ تمام اقسام اور تمام صورتوں میں دہشت گردی اور پرتشدد انتہاپسندی کے تمام اقدامات کی سختی سے مذمت کرتا ہے، بشمول سرحد پار دہشت گردی کے، اور انسداد دہشت گردی تعاون کے لیے اپنی وابستگی کو مزید مضبوط کرتا ہے۔ ہم 22 اپریل 2025 کو جموں و کشمیر کے پہلگام میں ہوئے دہشت گرد حملے کی سخت الفاظ میں مذمت کرتے ہیں، جس میں 25 ہندوستانی شہری اور ایک نیپالی شہری جاں بحق ہوئے، جب کہ کئی دیگر زخمی ہوئے۔

کواڈ نے متاثرین سے ہمدردی کا اظہار کیا

بیان میں مزید کہا گیا کہ ہم متاثرین کے خاندانوں سے اپنی گہری ہمدردی کا اظہار کرتے ہیں اور تمام زخمیوں کی جلد اور مکمل صحت یابی کی دل سے دعا کرتے ہیں۔ ہم اس قابل مذمت فعل کے مجرموں، منصوبہ سازوں اور مالی معاونت کرنے والوں کو فوراً انصاف کے کٹہرے میں لانے کا مطالبہ کرتے ہیں اور تمام اقوام متحدہ کے رکن ممالک سے اپیل کرتے ہیں کہ وہ بین الاقوامی قانون اور متعلقہ یو این سلامتی کونسل کی قراردادوں کے مطابق متعلقہ حکام سے بھرپور تعاون کریں۔

امریکہ کو بھی دی گئی وارننگ؟

اس سے پہلے ہندوستانی وزیر خارجہ ایس جے شنکر نے اس مسئلے پر کہا تھا کہ دہشت گردی کے متاثرین اور مجرموں کو کبھی ایک برابر نہیں سمجھا جانا چاہیے۔ انہوں نے ہندوستان کا مؤقف واضح کرتے ہوئے کہا کہ ملک کو کسی بھی خطرے کے خلاف اپنے شہریوں کا دفاع کرنے کا پورا حق حاصل ہے۔ یاد رہے کہ حالیہ دنوں میں امریکی صدر ڈونالڈ ٹرمپ نے کئی مواقع پر ہندوستان اور پاکستان کا نام ایک ساتھ لیا تھا، جس پر ایس جے شنکر نے ایک بار پھر علامتی طور پر امریکہ اور صدر ٹرمپ کو جواب دیا ہے۔

ایس جے شنکر نے پہلگام دہشت گرد حملے کا براہ راست حوالہ دیتے ہوئے کہا کہ حالیہ تجربات کی روشنی میں دنیا کو دہشت گردی کے خلاف زیرو ٹالرنس کی پالیسی اختیار کرنی چاہیے۔ انہوں نے کہا کہ متاثرین اور مجرموں کو کبھی بھی ایک جیسا نہیں سمجھا جانا چاہیے۔ ہندوستان کو دہشت گردی کے خلاف اپنے عوام کی حفاظت کرنے کا پورا حق حاصل ہے اور ہم اس حق کا استعمال کریں گے۔