نئی دہلی/ آواز دی وائس
دہلی میٹرو کے اسٹاف کوارٹر کی ایک عمارت میں پیر کی دیر رات آگ لگ گئی، جس کے نتیجے میں تین افراد کی موت ہو گئی۔ یہ واقعہ شمال مغربی دہلی کے آدرش نگر علاقے میں واقع دہلی میٹرو ریل کارپوریشن کے اسٹاف کوارٹر میں پیش آیا۔ مرنے والوں کی شناخت 42 سالہ اجے ومل، ان کی 38 سالہ اہلیہ نیلم اور ان کی 10 سالہ بیٹی جاہنوی کے طور پر ہوئی ہے۔ آگ لگنے کی اطلاع صبح 2 بج کر 39 منٹ پر مجلس پارک میٹرو اسٹیشن کے سامنے ایف بلاک میں واقع ڈی ایم آر سی اسٹاف کوارٹر سے موصول ہوئی۔
دہلی فائر سروس کے مطابق، آگ عمارت کی پانچویں منزل پر گھریلو سامان میں لگی تھی۔ آگ بجھانے کے لیے چھ فائر ٹینڈر موقع پر بھیجے گئے اور صبح 3 بج کر 20 منٹ تک آگ پر قابو پا لیا گیا۔ ایک سینئر فائر افسر نے بتایا کہ آگ بجھانے کے بعد فائر بریگیڈ کے اہلکاروں نے متاثرہ فلیٹ سے تین جھلسے ہوئے لاشیں برآمد کیں۔
آگ بجھانے کے آپریشن کے دوران راکیش نامی ایک فائر مین کے ہاتھ میں چوٹ لگ گئی، جسے جگ جیون اسپتال لے جایا گیا، جہاں ابتدائی طبی امداد کے بعد اسے چھٹی دے دی گئی۔ آگ لگنے کی وجہ تاحال معلوم نہیں ہو سکی ہے اور معاملے کی مزید جانچ جاری ہے۔
