نئی دہلی/ آواز دی وائس

مرکزی وزیر داخلہ امت شاہ نے جمعرات کے روز کہا کہ اقتصادی مجرموں، سائبر مجرموں، دہشت گرد سرگرمیوں میں ملوث افراد اور دیگر تمام مفروروں کے خلاف سخت رویہ اختیار کیا جانا چاہیے تاکہ انہیں ہندوستانی عدالتی نظام کے دائرے میں لایا جا سکے۔ امت شاہ نے تمام ریاستوں سے اپیل کی کہ وہ کم از کم ایک بین الاقوامی معیار کی جیل کوٹھڑی قائم کریں تاکہ غیر ملکی عدالتوں میں مفروروں کی جانب سے پیش کی جانے والی جیلوں کے کم معیار کی دلیلوں کو رد کیا جا سکے۔

انہوں نے کہا کہ بدعنوانی، جرائم اور دہشت گردی کے خلاف ہی نہیں، بلکہ ہندوستان سے باہر سرگرم مجرموں کے خلاف بھی کسی قسم کی رعایت نہیں برتی جانی چاہیے۔ وزیر داخلہ نے زور دیا کہ تمام مفروروں کو قانون کے دائرے میں لانے کے لیے ایک واضح نظام تشکیل دیا جانا چاہیے۔ انہوں نے کہا کہ چاہے وہ اقتصادی مجرم ہوں، سائبر کرائم میں ملوث ہوں، دہشت گرد سرگرمیوں سے وابستہ ہوں یا منظم جرائم کے نیٹ ورک کا حصہ ہوں — ہر ایک مفرور کے خلاف سخت رویہ اپنانا ضروری ہے تاکہ اسے ہندوستانی عدالتی نظام کے سامنے پیش کیا جا سکے۔ اب اس پر عمل کرنے کا وقت آ چکا ہے۔

امت شاہ نے کہا کہ وزیر اعظم نریندر مودی کی قیادت میں حکومت نے ایسے مؤثر اقدامات کیے ہیں جن سے کوئی بھی مجرم قانون کی گرفت سے بچ نہ سکے۔ انہوں نے کہا کہ وزیر اعظم مودی کی قیادت میں ایک طاقتور ہندوستان نہ صرف اپنی سرحدوں کی حفاظت کر رہا ہے بلکہ قانون کی بالادستی کو بھی مضبوط کر رہا ہے۔

وزیر داخلہ نے کہا کہ جرائم اور مجرموں کی چالیں چاہے کتنی بھی تیز ہوں، انصاف کی رفتار ان سے زیادہ تیز ہونی چاہیے۔ انہوں نے جولائی 2024 سے نافذ ہونے والے نئے فوجداری قوانین کا ذکر کرتے ہوئے کہا کہ آزادی کے بعد پہلی مرتبہ غیر حاضری میں مقدمہ چلانے کا بندوبست کیا گیا ہے۔

انہوں نے وضاحت کی  کہ اگر کسی شخص کو مفرور قرار دے دیا جاتا ہے تو عدالت اس کے دفاع کے لیے وکیل مقرر کر کے اس کی غیر موجودگی میں بھی مقدمہ چلا سکتی ہے۔ ایک بار مفرور قرار دیے جانے کے بعد بین الاقوامی قوانین کے تحت اس کی قانونی حیثیت میں بڑا فرق آ جاتا ہے۔ اس طرح ہم کسی بھی مفرور کو، چاہے وہ دنیا کے کسی بھی کونے میں ہو، قانون کے کٹہرے میں کھڑا کر سکتے ہیں۔  امت شاہ نے کہا کہ مودی کے وزیر اعظم بننے کے بعد حکومت نے کئی مؤثر نظام قائم کیے، جن میں 2018 کا مفرور اقتصادی مجرم ایکٹ بھی شامل ہے، جس کے تحت حکومت کو مفروروں کی جائیداد ضبط کرنے کا اختیار حاصل ہو گیا۔

انہوں نے کہا کہ گزشتہ چار برسوں میں ہم نے تقریباً دو ارب امریکی ڈالر کی وصولی کی ہے، جو ایک اہم کامیابی ہے۔ ہمیں اس رفتار کو مزید بڑھانا ہوگا۔

انہوں نے مزید کہا کہ منی لانڈرنگ کی روک تھام کے قانون  کو بھی مزید مضبوط بنایا گیا ہے اور 2014 سے 2023 کے درمیان تقریباً 12 ارب ڈالر مالیت کی جائیدادیں ضبط کی گئی ہیں۔ وزیر داخلہ نے کہا کہ چونکہ سی بی آئی استرداد کے لیے نامزد ایجنسی ہے، اس لیے ہر ریاست کو چاہیے کہ وہ اس کی مدد سے ایک مخصوص یونٹ قائم کرے تاکہ اپنے اپنے علاقوں سے فرار ہونے والے مجرموں کو واپس لانے کے لیے ایک مؤثر نظام تیار کیا جا سکے۔

انہوں نے بتایا کہ سی بی آئی نے بین الاقوامی سطح پر مفروروں کو پکڑنے کے لیے ایک خصوصی عالمی آپریشن سینٹر قائم کیا ہے، جو دنیا بھر کے پولیس محکموں کے ساتھ حقیقی وقت میں رابطے میں رہتا ہے۔امت شاہ نے کہا کہ جنوری سے ستمبر 2025 کے درمیان 189 ریڈ نوٹس جاری کیے گئے ہیں، جو سی بی آئی کی تاریخ میں اب تک کی سب سے بڑی تعداد ہے۔

انہوں نے کہا کہ یہ ظاہر کرتا ہے کہ جب نظام مؤثر طریقے سے نافذ کیا جائے تو بہترین نتائج حاصل ہوتے ہیں۔ انہوں نے مزید بتایا کہ بین الاقوامی پولیس تعاون کے لیے سی بی آئی نے جو آن لائن پورٹل "بھارت پَوَل" بنایا ہے، اس نے جنوری 2025 سے اپنی شروعات کے بعد سے ہی شاندار نتائج دیے ہیں۔

امت شاہ نے کہا کہ اگر ریاستی پولیس فورسز بھی اس پورٹل کا زیادہ استعمال کریں، تو ہم اپنے مقاصد کو مزید کامیابی سے حاصل کر سکیں گے۔