سپنا وید

ایک ایسے ملک میں جو خاندانی اقدار اور بزرگوں کے احترام پر فخر کرتا ہے، ایک خاموش بحران بند دروازوں کے پیچھے پنپ رہا ہے۔ ہندوستان تیزی سے ’بزرگ‘  ہو رہا ہے ۔ لیکن جھریوں اور تجربات کے ساتھ ساتھ، ہمارے لاکھوں بزرگ ایک ایسا بوجھ اٹھائے ہوئے ہیں جو نظر نہیں آتا۔ ایک ذہنی بیماری جس پر کوئی بات نہیں کرنا چاہتا۔ہندوستان میں ذہنی صحت کے بارے میں بات چیت بالآخر جڑ پکڑ رہی ہے۔ مشہور شخصیات اپنے ذہنی دباؤ کی کہانیاں کھل کر بیان کر رہی ہیں، کمپنیاں فلاح و بہبود کے اقدامات متعارف کرا رہی ہیں، اور سوشل میڈیا پر تھراپی، بے چینی اور خود نگہداشت کے بارے میں پوسٹس عام ہو رہی ہیں۔ نوجوان نسلوں کا خاموشی توڑنا حوصلہ افزا ہے، لیکن اس دوران ہمارے بزرگ خاموش ہی رہے، اپنی جذباتی تکلیف اکیلے سہتے ہوئے۔

ہندوستانی گھروں میں ذہنی صحت کے بارے میں بات کرنا اب بھی عام نہیں؛ یہ اب بھی بدنامی، الجھن، اور بعض اوقات شرمندگی میں گھرا ہوا موضوع ہے۔ آج بھی "کمزور مت بنو" یا "لوگ کیا کہیں گے؟" جیسے جملے عام ہیں۔ جذباتی تکلیف کو اکثر توہمات کے ساتھ جوڑ دیا جاتا ہے یا محض زیادہ سوچنے کا نام دے کر رد کر دیا جاتا ہے۔ اور جب بات بزرگوں کی ہو، تو اسے اکثر صرف بڑھاپے کا اثر کہہ کر نظر انداز کر دیا جاتا ہے۔

تاہم، اعداد و شمار کچھ اور ہی کہتے ہیں۔

ہندوستان ایک شدید ذہنی صحت کے بحران سے دوچار ہے ۔ ملک میں 19 کروڑ 70 لاکھ سے زائد افراد ذہنی امراض کے ساتھ زندگی گزار رہے ہیں۔ یعنی ہر 10 میں سے تقریباً 1 بالغ اس وقت کسی ذہنی بیماری کا شکار ہے، اور لگ بھگ 14 فیصد اپنی زندگی کے کسی نہ کسی موڑ پر اس کا سامنا کریں گے۔ یہ صرف اعداد نہیں، بلکہ وہ حقیقی لوگ ہیں جو اپنی تکلیف خاموشی سے جھیل رہے ہیں۔ اور ان میں سب سے زیادہ متاثر ہونے والوں میں ہمارے بزرگ شامل ہیں۔تقریباً 8 کروڑ 36 لاکھ افراد 60 سال یا اس سے زیادہ عمر کے ہیں۔ اس بڑی آبادی کے درمیان ذہنی صحت کا بحران چھپا ہوا ہے جسے اکثر نظر انداز کر دیا جاتا ہے۔ مطالعات بتاتے ہیں کہ 1.7 سے 3.4 کروڑ بزرگ افراد ایسے ہیں جو ڈپریشن، بے چینی یا ڈیمنشیا جیسے دماغی امراض کا شکار ہیں ۔ مگر ان کی تشخیص نہیں ہو پائی۔

یہ مسئلہ اولڈ ایج ہومز میں اور بھی سنگین ہو جاتا ہے۔ تحقیق کے مطابق ان اداروں میں مقیم تقریباً دو تہائی بزرگ ۔ یعنی 64.4 فیصد ۔ کسی نہ کسی ذہنی بیماری میں مبتلا ہیں۔ یہ ایک خاموش وبا ہے جو نظروں سے اوجھل ہے۔ان میں سے بہت سے لوگ اپنے خاندانوں سے دور ہو چکے ہیں یا مجبوری کے تحت اولڈ ایج ہومز میں ہیں۔ یہ محض اعداد نہیں، یہ ماں باپ، دادا دادی، ریٹائرڈ اساتذہ، فنکار، کسان اور دیگر لوگ ہیں۔ وہ افراد جو کبھی بھرپور زندگی جیتے تھے، اب خاموشی، تنہائی اور ناامیدی سے لڑ رہے ہیں۔نشانات کو پہچاننا مشکل ہوتا ہے۔ ایک بزرگ مرد جو تنہائی اختیار کر لیتا ہے، ایک دادی اماں جو نام بھولنے لگی ہیں، یا کوئی جو زندگی سے دلچسپی کھو چکا ہے ۔ یہ صرف بڑھاپے کی علامات نہیں، بلکہ ممکنہ طور پر ڈپریشن یا دماغی بیماری کی نشانیاں ہو سکتی ہیں۔بدقسمتی سے، بہت سے خاندان یا تو ان علامات کو پہچان نہیں پاتے یا بدتر، نظر انداز کر دیتے ہیں۔ ذہنی صحت پر بات کرنا ویسے ہی مشکل ہے۔ اس پر نسلوں کے درمیان فاصلہ، پرانی سوچ اور آگاہی کی کمی بھی شامل ہو جائے تو نتیجہ یہ نکلتا ہے کہ بے شمار بزرگ جسمانی طور پر تو موجود ہوتے ہیں، لیکن جذباتی طور پر تنہا اور گم ہوتے جا رہے ہیں۔

بزرگ افراد ذہنی صحت کے مسائل کے لیے زیادہ کمزور کیوں ہوتے ہیں؟

تنہائی، شریکِ حیات کا انتقال، مالی غیر یقینی، مسلسل بیماریوں کا دباؤ، اور بوجھ بننے کا کرب ۔ یہ تمام چیزیں ان کی جذباتی صحت پر منفی اثر ڈالتی ہیں۔ کچھ اپنے بچوں کے ساتھ رہتے ہیں، لیکن وہ گھرانے خود اتنے مصروف اور دباؤ میں ہوتے ہیں کہ ان کے پاس وقت یا توانائی نہیں بچتی کہ وہ جذباتی طور پر جڑ سکیں۔دوسرے اکیلے رہتے ہیں، صحت اور گھر دونوں کا بوجھ سنبھالتے ہوئے۔ اور ہاں، بزرگوں کے ساتھ بدسلوکی ۔ چاہے وہ جذباتی ہو، زبانی ہو یا جسمانی ۔ اب بھی کئی گھروں کی تلخ حقیقت ہے۔

مزید بدقسمتی یہ ہے کہ ہندوستان میں بزرگوں کی ذہنی صحت کے ماہرین کی بہت کمی ہے۔ بزرگوں کے لیے ذہنی صحت عام طور پر معمول کی صحت کی جانچ کا حصہ نہیں ہوتی۔ زیادہ تر اسپتالوں میں، جب تک کوئی ہنگامی صورتِ حال نہ ہو، ڈاکٹر بزرگ مریضوں کی جذباتی حالت کے بارے میں نہیں پوچھتے۔نوجوان نسل کو آن لائن تھراپی اور سپورٹ گروپس تک رسائی ہے، لیکن زیادہ تر بزرگ ان ڈیجیٹل پلیٹ فارمز سے واقف نہیں یا اعتماد نہیں رکھتے کہ وہاں مدد مانگیں۔

اب کہاں جائیں؟

سب سے پہلے، ہمیں اپنے گھروں میں بزرگوں سے بات کرنی ہوگی۔ ان سے صرف جوڑوں کے درد یا بلڈ پریشر کے بارے میں نہ پوچھیں، بلکہ یہ بھی پوچھیں کہ وہ کیسا محسوس کرتے ہیں؟ وہ کیا سوچتے ہیں؟ کس بات سے ڈرتے ہیں؟ بعض اوقات، وہ صرف سننے والے کی تلاش میں ہوتے ہیں۔دوسرا، صحت کا نظام اس ضرورت کے مطابق خود کو ڈھالے۔ ہر بزرگ کی طبی جانچ میں ذہنی صحت کی اسکریننگ شامل ہونی چاہیے۔ ڈاکٹرز اور نگہداشت کرنے والوں کو تربیت دی جائے کہ وہ بزرگوں کی جذباتی مشکلات کو پہچان سکیں۔ حکومت کو بزرگوں کے لیے مخصوص ذہنی صحت کے پروگراموں میں سرمایہ کاری کرنی چاہیے ۔ یہ کسی اضافی مہم کے طور پر نہیں، بلکہ عوامی صحت کے بنیادی حصے کے طور پر۔کمیونٹی سینٹرز، بزرگوں کے کلب اور یہاں تک کہ مندر بھی رابطے اور شفا کے محفوظ مقامات بن سکتے ہیں۔ جو این جی اوز بزرگوں کی نگہداشت پر کام کر رہی ہیں، انہیں اپنی توجہ جذباتی فلاح و بہبود کی طرف بھی مرکوز کرنی چاہیے۔ چھوٹے اقدامات ۔ جیسے فون کالز کے ذریعے خیریت دریافت کرنا، کہانی سنانے کے حلقے، یا غم بانٹنے کے سیشن ۔ بزرگوں کو سکون دینے میں اہم کردار ادا کر سکتے ہیں۔

سب سے بڑھ کر، ہمیں بڑھاپے کے تصور پر دوبارہ غور کرنا ہوگا۔
بڑھاپے کا مطلب پس منظر میں چلے جانا نہیں ہونا چاہیے۔ یہ زندگی کا ایک ایسا مرحلہ ہونا چاہیے جس میں عزت، سکون اور جذباتی فلاح ہو ۔ نہ کہ خاموش اذیت۔ذہنی صحت صرف نوجوانوں کا مسئلہ نہیں ۔ یہ ہم سب کو متاثر کرتی ہے۔ ہمارے بزرگ، جنہوں نے پوری زندگی دوسروں کی پرواہ میں گزاری، انہیں اکیلے اس جدوجہد سے نہیں گزرنا چاہیے۔